Acordies los datos espublizaos ayeri pol Ministeriu de Trabayu, Migraciones y Seguridá Social, la tradicional cayía d’emplegu de fin de branu dexa n’Asturies una cifra de 70.562 desemplegaos, ello ye, que’l númberu de parados rexistraos nes oficines del Istitutu Nacional d’Emplegu (INEM) n’Asturies medró nel mes de septiembre en 2.269 persones, lo que supón un xorrecimientu del 3’32 % respeuto al mes anterior

El branu ya nun fore especialmente bonal: n’agostu perdiérense ya 301 emplegos. En setiembre, y pesi a la subida de contrataciones n’educación y servicios relacionaos, foron más de dos mil los asturianos que quedaron en paru. Esti aumentu afeutó especialmente a les muyeres, con 1.436 nueves paraes, un total de 40.145 frente a los 30.417 homes que nun tienen trabayu.

Por conceyos, considerando namás los de más moraores, el que mayor tasa de paru presenta ye Mieres, col 20,42% de la población nesa situación, siguío de Xixón, SMRA y Llangréu, con alrodiu’l 18 % y Avilés, con 17%.

Nun ye un fechu xeneralizáu, esti mes de Setiembre nel estáu español subió bultablemente l’emplegu en seies comunidaes y caltúvose más o menos estable n’otres cinco.

Arriendes d’ello, Asturies sigue presentando la tasa d’actividá más baxa del estáu, namás el 50,81% de la población de 16 años o más participa nel mercáu llaboral.

Nuria Prendes