L’espoxigue de grupos nacis y fascistes permite que se multipliquen les menacies y agresiones contra persones y organizaciones d’izquierdes, amparaes na impunidá llegal y mediática d’estos coleutivos d’estrema drecha española

En febreru l’añu pasáu una manifestación percorría les cais de Llangréu denunciando l’espoxigue de los continuos ataques de grupos organizaos d’estrema drecha, tantu a inmigrantes comu a organizaciones sociales y politiques d’izquierdes -menacies, coches estrozaos, móviles robaos, puertes pintaes, estroces en llocales, sabotaxes a monumentos hestóricos ya mesmo delles agresiones personales-.

Sicasí, fizo falta una muerte -la de Javier Ardines- pa que na prensa se ficiere un pocu ecu de la situación d’acosu na que vive la izquierda asturiana. La impunidá na que se mueven estos grupos fascistas permite qu’entá nun se diere colos asesinos de Javier, pero tamién que l’alcaldesa de Riosa reciba menacies de muerte, y que nun pase na,  que José Manuel Pello, conceyal, alcuentre estrozáu’l coche con menacies de muerte (DEP) y nun pase na, y agora que’l conceyal d’Urbanismu d’Uviéu, Ignacio Fernández del Páramo, reciba un anonimu con cuchiellu nel so mesmu cientru de trabayu. Tou ello en menos de dos meses. Tou ello ensin consecuencies.

Nuria Prendes