Les complicaes condiciones metereolóxiques d’esti añu faen cayer la produción de los principales productos de seronda, ello ye, mazana, castaña y miel
Los apicultores asturianos collecharon esti añu un 60% menos que nel añu anterior, un parón nun seutor que ta n’espoxigue, con un incrementu de produción netu del 30% nos caberos diez años (quitando esti). Ello llevó a que nes ventes na emblemática Feria del miel de Bual los precios subieren un par d’euros por kilo, de media, costando el tarru pente diez y doce euros, lo que nun torgó que se vendieren más de 3.000 kilos. Ta pendiente que la miel asturiana algame’l sellu de calidá IXP (Indicación Xeográfica Protexío) qu’apurriría más valir a esti productu tan nuesu.
La collecha de castaña ye más abegosa de midir, considerando la falta de control de la mesma y la falta de plantaciones que se dediquen a la gueta y venta organizada d’esti productu, un recursu entá ensin esplotar afayaizaente n’Asturies cuyu aprofitamientu anguañu se reduz a la gueta y la vienta en prieto de dalgunes castañes asturianes y a la compra de castaña d’afuera, al tiempu que la mayoría de les castañes pudren pel monte por falta de recoyida. Esti añu, quien nun puea costatar por si mesmu que la mayoría de les castañales tan vacíes entá a estos altores del añu, puede comprebar la escasez de la collecha echando una güeyada a los precios qu’algama nes tiendes: alrodiu los 5€ el kilo, polo xeneral de castaña mercada fuera d’Asturies. Mal añu pa magüestos.
El casu de la mazana ye estremáu, ya que a les condiciones metereolóxiques y la ñevada tempranera, que pilló a munches pumaraes ensin pañar, súmase la vecería, qu’esti añu ya facía la collecha escaso, faciendo preciso pa munchos llagares mercar mazana de fuera d’Asturies pa la sidre que nun ye de D.O. Sicasí, ye precisamente la necesidá de competir en preciu cola mazana esportao la que fuercia a los pumareros a caltener precios más baxos de lo que sedría xusto pa la escasa produción del añu.
Llucía F.Marqués
This work is licensed under a Creative Commons Attribution 4.0 International License.
