La tasa de movilidá recoyida nel añu 2017 ye la más alta del sieglu, siendo asina qu’un 8’2% de los contratos roblaos implicaba la movilidá del profesional fuera d’Asturies

Los datos, recoyíos pola empresa de recursos humanos Randstad, sobro la evolución de la tasa de movilidá de magar les cifres del Serviciu d’Emplegu Públicu Estatal amuesen una sangría continua de trabayaores, mayoritariamente cualificaos, d’Asturies faza España

18.436 profesionales, más de 50 por díe, camudaron la so residencia pa ocupar emplegos n’España, un total de 39.145 contratos de trabayu roblaos pa trabayar, principalmente, en Madrid o Barcelona, pero tamién en Baleares, Cádiz o Toledo. La mayoría d’estos trabayadores nun tornarán a vivir n’ Asturies.

L’altu númberu de contratos, cuasique dos por persona nun mesmu añu, indica que, amás de desixir l’abandonu del país, trátase d’emplegos precarios, munchos d’ellos de calter temporal, colo que la desllocalización ya’l desraigañu nun apurre la naguada estabilidá.

A estes cifres hai qu’amiestar les de los asturianos forciaos a emigrar a otros países y los que tienen que colar por motivos académicos, dando un cómputu total que s’avera a los 30.000 asturianos desplazaos nun añu. El impautu social ya económicu que tien la perda d’esta mocedá sobro una población ya envieyecío y escaso esmolez fonderamente a Andecha Astur, partíu políticu que dende va ya dalgún tiempu vien denunciando lo que denominen el “xenocidiu anunciáu” d’Asturies.

Nuria Prendes

This work is licensed under a Creative Commons Attribution 4.0 International License.