Andecha Astur alvierte que con Alcoa pue repetise la hestoria de la Naval, la minería, la siderurxa…”Que’l “Principado” dea la cara y que les direiciones sindicales nun se vendan, esa ye la custión, non la capacidá de movilización y llucha de los trabayaores asturianos, qu’enxamás nun fallaron”
Más de mediu centenar de miles de presones, el 5% de los asturianos, ocuparon ayeri’l cientru d’Avilés pa desixir la permanencia de la planta de la multinacional aluminera d’Avilés. Aportaron dende toa Asturies nuna marexada de solidaridá que munchos nun dulden n’apellidar de “ensin precedentes”.
Sicasí, tien precedentes. Les multitudinaries manifestaciones en defensa del seutor Naval, ensin dir más lloñe, les de Tenecco, tamién en Xixón, les descomanaes amueses de sofitu a Duro Felguera y comu non, les mítiques protestes mineres pRr toa Asturies y fuera d’ella. Exemplos toos, p’A.A, de preslles interesaos, con un gobiernu del “Principado” “atecháu a les órdenes de Madrid, que nun defende los intereses de los asturianos, y unes direiciones sindicales qu’aparen les movilizaciones y pauten per detrás”.
Pa la organización política, nesta manifestación, xunto a los representantes vecinales, pensionistes, clus esportivos, músicos, asociaciones culturales y sociales, reciella, pequeños empresarios, grupos ecoloxistes, families y afeutaos d’otros conflictos –nun hai dubia de qu’Asturies entera volcóse con Alcoa– viéronse munchos “Villas” pel mediu.
En resume si bien el Pueblu Asturianu tornó a dar una rempuesta exemplar, sofitando cola so voz y presencia a los trabayadores d’Alcoa, ye preciso qu’esta vegada la rempuesta del “Principado” seya rápida y contundente, ensin esperar a que-yos manden dende Madrid lo que tienen que facer. Y que naide nun los venda.
Llucía F. Marqués
This work is licensed under a Creative Commons Attribution 4.0 International License.
