Énte la falta de formación xeneralizada per parte de los ensiñantes nes cuestiones que cinquen a l’Alta Capacidá y la dificultá a la de poner en marcha planes específicos que respuendan a les necesidaes d’esti coleutivu, l’Asociación de Pa d’Alumnos d’Altes Capacidaes punxeron en marcha un cursu especial pa docentes
La gran mayoría de los alumnos con Altes Capacidaes asturianos nun ta diagnosticáu o ta diagnosticáu incorrechamente: Un 0,59% de los escolinos asturianos tán diagnosticaos como d’Altes Capacidaes intelectuales cuando los datos indiquen que siquier un 2,28% de la población les tien; eso implica que namás la cuarta parte d’ellos tán deteutaos pol sistema educativu.
Los más de 700 alumnos que sí tán diagnosticaos reciben una atención bien aleatoria, dependiendo del centru, del equipu d’orientación y del docente a cargu, pero polo xeneral el desconocimientu de la tema y en munchos casos la falta d’interés deriva nuna total desatención de les sos necesidaes o na aplicación de midíes dafechu erronees -ye avezada l’asignación de xeres estres o’l centrar l’enfotu en cuestiones como “l’orde”, la “obediencia” o la “organización”, sistemes ambos contraproducentes pal escolín-. En contaos casos considérase la meyora de cursu, una midida que se demostró especialmente efeutiva.
Ye por ello que dende l’Asociación de Padres d’Alumnos d’Altes Capacidaes (APADAC) punxeron en marcha un cursu col que pretenden sensibilizar y formar al profesoráu asturianu en relación col alumnáu con perfil d’alta capacidá, en visu a llograr una mayor visibilización y comprensión del mesmu.
Esclariar conceutos, estremar perfiles y desterrar estereotipos van ser les primeres lleciones que van recibir los profesionales de la ensiñanza interesaos nesti cursu, pa de siguío afitar los pasos pa una actuación efectiva nes aules, conociendo pa poder prever los problemes derivaos de les AACC nos colexos.
El cursu, que tien un costu de cien euros, va costar de 30 hores presenciales que se van impartise de magar el 21 de Payares y va apurrir 3 creitos ECTS.
Na mesma llinia, va cellebrase mañana una xornada n’Uviéu que, sol títulu “Altes Capacidaes, superdotación, talentu… ¿Podemos ameyorar los nuesos sistemes para ser equitativos?” va tratar la tema dende estremaos enfoques profesionales.
Redaición InfoAsturies
This work is licensed under a Creative Commons Attribution 4.0 International License.
