L’Alcuentru-Xuntanza Muyeres del mundiu permitió compartir la visión de muyeres organizaes vinientes d’estremaos puntos del planeta, analizando les sos estratexes frente al abusu, el saqueo en territorios, el colonialismu, el patriarcáu ya’l racismu
Muyeres provenientes de R. Dominicana, Perú, Bolivia, Guatemala, Arxentina y Asturies aconceyaron esti fin de selmana en Xixón pa dar a conocer la resistencia de les muyeres y poner en comuña les alternatives que propugnen ante l’estractivismu depredador, el colonialismu ya’l patriarcáu que, d’estremaes maneres, elles carecen y combaten.
De toles esperaes namás faltó una, Flor Calfunao Paillalef Apo Werken – Embaxadora en Mission permanente Mapuche nes Naciones Xuníes, a la que se-y denegó la solicitú d’autorización a viaxar de Chile a Asturies, pesi a tener solicitao el viaxe en tiempu y forma: una amuesa de la situación que carecen quienes lluchen contra estaos totalitarios. Flor ta a la espera d’asilu, pendiente de la rempuesta del Comité contra la tortura de les Naciones Xuníes.
Na apertura compartiéronse testos ya imáxenes de muyeres defensores y darréu una ceremonia espiritual valió pa simbolizar la xunidá de les muyeres a un y otru llau de la mar.
Darréu dióse pasu al tema cientral de la xornada, que continuaría los dos díes: Muyeres del mundu: Valores ecosociales vs Estractivismu depredaor.
El feminismu comunitariu territorial, la represión, l’esiliu, la naturalización de violencies en comunidaes, el machismu indíxena acentuáu pola imposición relixosa ya el racismu foron dalgunos de los temes que se tocaron.
La estroza incontrolada de la naturaleza, coles consecuencies qu’abarquen dende los Picos d’Europa fasta l’Amazonia foi otra de les protagonistes del alcuentru, recordando dalgunes de les lluches venceyaes a ello, como la guerra del agua de Cochabamba, la guerra del gas que hizo fuxir al presidente Goni a USA o la refuga a les mines d’oru en Salave, y dedicando unes pallabres a los trabayaores mercurizaos en güelga de fame, o los trabayadores d’ALCOA, victimes tamién d’esti sistema que busca el beneficiu perriba la mesma tierra y les persones.
Les presentes espresaron tamién el so esmolecimientu pola escoyeta de Bolsonaro en Brasil, quien “afirma que va gobernar con la biblia na man y trae al presente el mesmu patriarcáu, el despreciu a los drechos de les muyeres y a la diversidá”.
Nel segundu día punxeron en tela xuiciu la visión europeizante de la cooperación pal desendolcu, que s’enfrenta direutamente a les otres visiones y formes de pensar y sentir el mundiu, contrapuestes a los valores que propugna’l capitalismu
Como conclusión, la necesidá de mirar a llargu plazu y sumar. Sumar la llucha de clases cola llucha contra el racismu, la llucha pola sesualidá, la llucha xénero-patriarcáu, “con muyeres y homes, hacia la Recuperación de llazos que xunen toles partes de la Vida-con mayor Xusticia , pa detener el modelu depredaor capitalista-racista-patriarcal”, fortaleciendo aliances pente los pueblos.
Llucía F. Marqués
This work is licensed under a Creative Commons Attribution 4.0 International License.
