Consideren que la convocatoria oficial, baxu’l llema “Fuera’l machismu de les nueses aules” nun ye más qu’un paripé nel que se desvía l’atención de los estudiantes faza’l tema mediáticu del momentu polo que mañana acudirán a la Escandalera (Uviéu) y a la Plaza’l Parchís (Xixón) pero como un bloque estremáu dientro’l manifestamientu
Dende estremaos coleutivos anticapitalistes, pente los que s’alcuentra el Bloque Críticu Estudiantil, la Mocedá de la CSI, el coleutivu Bujarra y la Xuventú combativa, entamarán aiciones conxuntes pal 14 de payares, díe nel qu’hai convocada una fuelga estudiantil nes principales ciudaes d’Asturies.
Sicasí, en llugar de dir a “remolque” de la convocatoria oficial, planteguen una revindicación real cola que poner enriba la mesa “una alternativa revolucionaria nes universidaes, institutos y barrios obreros. Un proyectu que ruempa col discursu conciliador y socialdemócrata col que tanto nos bombardeen constantemente.”
Pa ello, participarán como un bloque estremáu dientro los manifestamientos convocaos al mediudíe en Xixón y Uviéu ya entamarán un empreslle combativu na universidá de pedagoxía, a les 4 de la tardi, con charres y alderiques nos que se tratarán temes d’actualidá.
Dende’l so puntu de vista, esta convocatoria “sólo ye un paripé más promovíu polos comenenciosos de siempre, que lleven faciendo lo mesmo dende fai décades con escases resultancies, promocionaos pelos principales medios de comunicación que, como sabemos, nun son precisamente bien amigos de la realidá y la veracidá informativa. Sólo busquen atraer a la mocedá en base a les cuestiones más mediátiques del momentu, faciéndonos creer a la xente que les fuelgues son un fin en sí mesmu, y non una “ferramienta” pa consiguir determinaos fines, anulando asina’l so conteníu y significáu real”.
Acusen a los convocantes de la fuelga de nun entrar en fondura nes temes que vraeramente afeuten a tol coleutivu estudiantil, fomentando’l tracamundiu y la desorganización ente los estudiantes y la clas trabayadora; al tiempu, reconocen la necesidá de movilizar a los estudiantes ya implicalos nos problemes de la mocedá y la sociedá en xeneral, polo que siguirán la fuelga, seique dando-y un enfoque estremáu, tratando de romper cola idega del “movimientu pol movimientu” y de la ” unidá abstracta” y del cortoplacismu que lleva tanto tiempu somorguiáu ente les organizaciones y colectivos populares”.
Redaición InfoAsturies
This work is licensed under a Creative Commons Attribution 4.0 International License.
