Los negocios de les Arriondes riscaron el vienres 16 con carteles de preslle, munchos ufriendo venta, arriendu o trespasu, los escaparates tapaos, les puertes presllaes. Nun foi más qu’un sustu, una midía tomada polos comerciantes del pueblu pa facer a la xente decatase de les vraeres consecuencies de siguir en masa los dictaos comerciales de les grandes empreses. Queríen revindicar el pequeñu comerciu díes anantes del entamu’l Black Friday.

Nun tenemos costancia de si la midía tuvo repercusión pente los parragueños, lo que si sabemos ye que, en xeneral, decenes de miles d’asturianos acudieron en tropel a la llamada de les multinacionales, atarraquitando los aparcamientos de cientros comerciales y aguantando coles interminables p’aforrar 5, 10, 15 o fasta 50€ en daqué que nun cuntaben mercar, siendo munches vegaes l’aforru menor del gastu estra en combustible col que superar la caravana d’entrada.

Dan igual les denuncies d’Asociaciones de Consumidores, demostrando que los precios con descuentu nun son, n’abondos casos, talos, sinon burdes manipulaciones del “preciu anterior”, da igual les protestes de trabayaores que nun reciben un chapu pola carga estra de trabayu, nin los avisos de los piqueños comerciantes sobre les consecuencies pa la economia xeneral d’unviar los beneficios a dellos países de distancia.

Como mures tres d’un rellumante flautista, los consumidores asturianos siguieron la conseña a la perfeición y llanzáronse a mercar comu descosios, n’interné o nos grandes cientros comerciales del país, a arrampluñar de les manes de les multinacionales los sos stocks invendibles anantes d’entamar la tradicional subida de precios navidiegos. Entantu, nos nuesos pueblos y ciudaes los comercios van morriendo, tornándonos en pueblos pantasmes de puertes presllaes. Non solo afeuta a los comerciantes, la riqueza sal del pueblu, sal del país, revierte notres families que nun son les de nos. A curtiu plazu vacíense les tiendes, a mediu les cais, a llargu los pueblos.

En Les Arriondes ya tuvieron un adicu de  lo que puede llegar a ser el so pueblu, nel restu d’Asturies podemos maxinalo. Otres coses dependen de les alministraciones, esta, de nos.

Llucía F. Marqués