Les reaciones ante los nueos Presupuestos nun se faen esperar: la llingua recibirá menos d’un 0’04% del presupuestu y la oficialidá nun apaez nin siquiera mencionada nos mesmos
Les delegaciones de la izquierda española n’Asturies y recientes autoproclamaos cabezaleros de la llucha polos drechos llingüísticos (PSOE, IU y Podemos) vienen d’algamar un pautu pa sacar alantre los presupuestos del añu entrante, allanando de pasu el camín a futuribles coaliciones y pautos de gobiernu.
Dende Andecha Astur entruguen onde ta la dotación destinada a la implantación de la Oficialidá qu’estos mesmos partidos aporfien en defender “Nos Presupuestos nun se menciona siquiera la Oficialidá. Pa Podemos-IU la oficialidá ye un tema secundariu ¡ensiquiera la reconocen nos conceyos onde tienen mayoría.”
Pel so lláu, la Xunta pola Defensa la Llingua Asturiana denuncia tamién la ruina dotación dedicada a política llingüística nel proyeutu de presupuestos, escasamente el 0’04% del total, al tiempu que critica l’alta proporción d’esta partida que se destina al direutor de la RTPA, Antonio Virgili “que se niega a cumplir siquiera colo que diz la Llei d’Usu” pero qu’entá asina recibirá 70.000 euros en conceutu de “promoción del asturianu na RTPA”.
Pa la XDLA dar perres a una cadena pública pa qu’emita n’asturianu implica dar por fechu que TPA y RPA son cadenes n’español por defeutu y que pa facer daqué n’asturianu hai que poner dineru dende fuera.
Arriendes d’ello, na memoria d’oxetivos de RTPA pal 2018, nun hai nenguna referencia a la promoción del asturianu y namás se recueye nun puntu que la radio pública asturiana “divulga la llingua asturiana”.Anguañu namás s’emiten en RPA 10 minutos n’asturianu de llunes a vienres.
D’otra miente, la Xunta pola Defensa de la Llingua insiste’n que la partida total del presupuestu dedicáu a la promoción del asturianu ye irrisoria ya insuficiente, al ser la Dirección Xeneral de Planificación Llingüística y Normalización el departamentu con menos presupuestu de tola Administración autonómica. “Con acciones asina podemos ver que, a pesar de lo aprobao nel XXXII Congresu de la FSA, nin tenemos oficialidá nin muncho menos se cumple cola Llei d’Usu, que ye lo que dicíen los socialistes que diben facer hasta poder modificar l’Estatutu. Tamos viendo cada día que nin lo uno nin lo otro. Na probitú presupuestaria pal asturianu nun se ven diferencies ente la FSA nueva y la vieya”.
Llucía F. Marqués
This work is licensed under a Creative Commons Attribution 4.0 International License.
