La Fundación Brétagne Réunie xuntó les firmes precises pa solicitar, previu referendum popular, la reunificación del país Bretón, cola torna del departamentu de la Loire Atlantique a Bretaña
Acordies la llei francesa, 100.000 ye’l númberu de solicitantes imprescindible pa tener drechu a pidir una reforma territorial na qu’un departamentu camude de xurisdicción, y eso ye lo que quieren consiguir los bretones, la reconocencia como coleutividá territorial d’un Pais Bretón entamáu por cinco departamentos: Côtes-d’Armor, Finistère, Ille-et-Vilaine, Loire-Atlantique et Morbihan.
Foi nel 1941, baxo’l rexime de Vichy, cuando la Loire foi separtada del restu de Bretaña por primer vegada. Esti fechu ispiróse nel recorte por arzobispaos fechu pola ilesia católica y nel repartu alministrativu por “rexones económiques”, ensin respetar les identidaes nacionales contenies nos territorios .
Dende la presentación de les robles que dan pesu a la solicitú hai de marxe dica’l un de marzu del 2019 pa que’l conseyu departamental de Loira Atlánticu llance l’alderique llegalmente. Paul Loret, co-presidente de la fundación Brétagne réunie, fundada nel 1976 col enfotu de tornar a xunir tolos territorios bretones, afirmó que tien « enfotu na democracia », pero fasta l’intre nun cuenten más que cola promesa de tratar la cuestión nun plenu que se cellebrará el 17 d’Avientu nel conseyu departamental y nel que s’apurrirán otros miles de robles -que siguin recoyéndose-. Nel mesmu insistiráse na cellebración d’un referendum pente la población, en llugar de que la decisión seya tomada unillateralmente polos 62 conseyeros.
Nuria Prendes
This work is licensed under a Creative Commons Attribution 4.0 International License.
