Dende’l so apueste pa ufrir a los rapacinos asturianos la oportunidá d’esfrutar d’arruelu y cultura na so propia llingua y pente la escasa presencia del asturianu na programación oficial navidiega, Escenines ufre música y teatru de baldre pa tola familia

L’asociación Reciella families pol asturianu entama el sestu festival ‘Escenines’, con teatru n’asturianu pa neños y neñes. Trátase d’una actividá de baldre que va poner enriba les tables tres obres de teatru, con espectáculos d’Olga Cuervo, Papel Hixénicu Teatru y Mar Rojo Teatro, y un espeutáculu musical con cancios navidiegos esbillaos pa los más piqueños.

L’entamu pónenlu los cuentacuentos d’Olga Cuervo, que mos convida a sentir los sos “Cuentos a la lluz d’un candil”, el miércoles 26 d’Avientu a les siete la tardi, nel Cientru Cultura Antiguu Istitutu, pa siguir al díe viniente cola obra “Azul y la revolución de los collores”, nel mesmu sitiu y a la mesma hora. El tercer díe tendremos la oportunidá d’esfrutar d’un clásicu, “El Principín”, de la man de “Hixenicu Papel”.

El remate sedrá musical, cola Bandina de Músicos asturianos y la so esbilla de Cantares Navidiegos pa neños y neñes. Una programación pensada pa los asturfalantes más menudos de la que va esfrutar tola familia.

Nuria Prendes