Mª Jesús Aguilar, Direutora Xeneral de Desendolcu Rural, anunció va pocu que ta trabayándose nun Plan Estratéxicu pal seutor, con horizón en 2030
Disponer d’un Plan Estratéxicu permitiría saber haza onde se dirixe’l seutor y valorar les sos fortaleces y febleces, alantrándose a los futuros problemes, iguando los presentes y aprofitando les oportunidaes d’un mercáu n’espansión n’Europa y nel mundiu.
Fasta agora’l seutor sidreru avanzaba gracies al so propiu dinamismu, ensin planificación nin oxetivos concretos. A estos altores nun esisten datos fiables nin de la produición de mazana nin de sidre, nin del consumu, nin hai control de la trazabilidá del productu nin valoración de resultaos de les aides y subvenciones apurries ensin mayor control ya ensin criteriu estrictu nin programación. Pa Marcos Abel Fernández, direutor de la revista LA SIDRA, un de los muerganismos que más tiempu lleva desixendo esti plan, “ye urxente conocer cuala ye la situación rial de la sidre y la mazana n’Asturies, planificar, fixar oxetivos, valorar resultaos, rializar inversiones, incentivar el desendolcu con aídes y sovenciones con criterios conocíos y oxetivables, finar coles “ocurrencies” y les redes clientelares establecíes istitucionalmente… Ye imprescindible”.
Poro, la reclamación d’esti plan, que paez ser que finalmente sedrá rialidá anantes del 2030, ye ca vegada más asumía pol seutor de la sidre y la mazana, coscientes de qu’ensin el mesmu non solo l’avance ye abegosu, sinon que’l retrocesu ye previsible a curtiu plazu.
La relevancia del seutor sidreru dientro de la economía asturiana medró nos caberos años, pero más que pol so propiu xorrecimientu, pol desaniciu progresivu del restu de los seutores, convirtiéndose nun pegoyu importante pal desendolcu n’Asturies. L’avieyamientu de la población y la emigración forciao, asina comu la fuerte cayida de la capacidá alquisitiva de los asturianos, prevocaos poles polítiques del Estáu español sobro Asturies, supón pa esti seutor un perimportante amenorgamientu del mercáu potencial de la sidre, y augura unes mayores dificultaes a curtiu plazu.
Nes declaraciones feches por M.A.F amuesa la so confianza en que col Plan Estratéxicu nun pase como cola candidatura de la Cultura Asturiana de la Sidra como padremuñu inmaterial de la Humanidá pola Unesco, anunciada hai más de 10 años pol “Principado”, ensin que tovía nun fixeren un res.
Redaición InfoAsturies
This work is licensed under a Creative Commons Attribution 4.0 International License.
