Asturcopper preslla la so planta en Llugones (Sieru) por nun la considerar “un puntu estratéxicu nel so esquema empresarial” y por ser “pocu competitiva”. L’ochenta por cientu de la plantiya aceuta ser recolocao en Córdoba o Vitoria. Los trabayaores tan encantaos: cobraron el despidu másimu, siguen con trabayu, lleguen incluso a dicir que pescancien a la empresa

Asina s’escribe la hestoria contemporania d’Asturies: piqueños desanicios que mos lleven al desaniciu xeneral, decenes de families qu’abandonen Asturies por fuercia mayor y que de xuro nun tornarán. O tornarán, ellos o los fios, depués de perder los vezos, la fala, los raigaños. Dientro de la llaceria diaria los trabayaores de la planta d’Asturcopper Sieru considérense unos afortunaos, cenciellamente por que nun quedaron na cai: namai se van ver forciaos a dexar el país.

La factoría de filu de cobre ye un exemplu namás, pero ún qu’evidencia fasta qu’estremu la clas obrera asturiana tien interiorizao los valores d’empresa, anteponiendo la másima rentabilidá económica a los sos propios intereses, inorando dafechu cualisquier rellumu del conceutu de rentabilidá social. Y fasta que puntu se tien asumío lo inaceutable: ante les avezaes prautiques de despidu ensin miramientu nin pagu, una empresa que cenciellamente cumple la llei paez una prestosa esceición. La emigración ya ta tan encetada na sociedá asturiana que colar considérase un mal menor.

Siguimos camín del millón; y baxando.

Llucía F. Marqués

This work is licensed under a Creative Commons Attribution 4.0 International License.