Xixón entamó a trabayar con esti programa de calidá nel añu 2004 y, de magar, ye líder en númberu d’empreses y servicios distinguíos, con 233 empreses y servicios turísticos col distintivu Compromisu de Calidá Turística na ciodá

• El Teatru Xovellanos xúnese al restu d’estayes de Divertia Gijón que yá amuesen esti sellu, como son el Xardín Botánicu Atlánticu, Infoxixón y el Xixón Convention Bureau.
• Ciudadela de Celestino Solar, El Olivar de Noega, el restorán Scaletta 5 y los hoteles Begoña y Begoña Park tamién completen la llista de les 223 empreses reconocíes na ciudá pola so calidá turística.

El Teatru Xovellanos ye una de les seis empreses de Xixón distinguíes anguañu pela primer vegada con esti sellu de calidá, qu’acredita y reconoz l’esfuerciu realizáu poles empreses participantes, el compromisu cola calidá y l’ameyoramientu continuu y distingue a la empresa escontra la competencia. Al algamar el principal coliséu xixones  la distinción Compromisu de Calidá Turística pasa a formar parte del grupu privilexáu de doce teatros estatales que llucen esti distintivu; súmase amás al restu d’estayes de Divertia Xixón que yá disponen d’elli, como son el Xardín Botánicu Atlánticu, la Oficina d’Información Turística Infoxixón y el Xixón Convention Bureau.

Pa cumplir colos requisitos esixentes d’esti distintivu, el Teatru Xovellanos vien trabayando, nestos dos años caberos, n’ameyorar la seguridá, la señalización, los procedimientos d’evacuación, l’accesibilidá, la xestión interna, l’acoyida a les compañíes o artistes, la seguridá llaboral y la formación del personal, ente otros aspeutos. Arriendes d’ello, destaca por cuntar con una planificación y una programación bayurosa p’averar delles propuestes a tolos públicos.

Les seis nueves empreses de Xixón que van llucir el distintivu nes sos fachaes a partir de xineru de 2019 son:

• Ciudadela de Celestino Solar, na cai Capua, 7.
• El Olivar de Noega, na plazuela de San Miguel, 1 (Capua).
• Hotel Begoña, na avenida de la Costa, 44.
• Hotel Begoña Park, na carretera de la Providencia, 566.
• Restaurante Scaletta 5, na cai Ezcurdia, 8.
• Teatro Jovellanos, nel paséu de Begoña, 11.

Redaición InfoAsturies

This work is licensed under a Creative Commons Attribution 4.0 International License.