Un estudiu sobro posibles aprofitamientos de los montes asturianos espeya que la esplotación de les castañales podría multiplicar por seies los beneficios de los llantíos d’ocalitu

L’oxetivu ye torgar l’abandonu del monte y pa ello ye imprescindible, nel contestu actual, facelu rentable. Amás, un monte curiáu ye menos vulnerable a quemes y la so esplotación podría ufrir un mediu de vida dignu a los habitantes de los pueblos de montaña, torgando el so desaniciu. Con eses premises búsquense idegues d’usos de los terrenos forestales dende l’enfoque económicu, social y ambiental.

La conclusión ye que lo más productivo sedríen les castañales. Un castañéu de 15 años correchamente atendíu puede xenerar un productu añal por hectarea d’ente 6.000 y 8.000 euros, frente a los 1.000/2.000 que xenera un ocalital del mesmu tamañu. Eso namás en castañes, a mediu y llargu plazu la maera ye un segundu bien rentabilizable; amás, propónse la esplotación conxunta con cultivos de setes o cola apicultura, dos actividaes que, amás de ser enforma rentables en si mesmes, son bonibles pal entornu y pal óptimu desendolcu de los castañeos. Otra posibilidá ye acompangar la venta de les castañes direutamente con plantes de procesamientu; por exemplu, la fariña de castaña tien ca vegada mayor demanda pente los alérxicos al gluten ya’l marrón glacé ye en toa Europa un productu d’altu valir añadíu.

Llucía F. Marqués

This work is licensed under a Creative Commons Attribution 4.0 International License.