Los rapazos d’Altsasu lleven 779 díes presos por una marraza de chigre. El 18 y 19 de Xineru les sos families vienen a Asturies a informar del casu
Na nueche del 15 d’ochobre del 2016 once rapazos tuvieron una marraza con dos guardia civiles fuera de serviciu a los que nun se-yos engurrió siquiera la camisa (comu puede vese nos vidios d’esa nueche). De magar esos fechos, siete d’ellos foron encarcelaos provisionalmente, dexándose llibres a cuatro un mes depués, toos ellos acusaos de terrorismu. Por una bronca en chigre a les cinco la mañana.
El tribunal impón a los ocho acusaos penes d’ente dos y 13 años, seique descarta que la agresión tuviere fines terroristes, asina que son inculpaos por “delitos d’atentáu a los axentes de la Autoridá, llesiones, desórdenes públicos y menacies”. Nel xuiciu, prebes como videos y semeyes de los fechos inalmitíes, una xueza venceyada por familia a la Guardia Civil, informes contradictorios, etcétera. Hai que parase a camentar que se yos da la consideración d’axentes de l’autoridá, mientres que nel casu La Manada se determina que, al tar fuera de serviciu, nun se considera la so pertenencia a la Guardia civil. En resume, fasta 13 años por fechos que nun pudieron prebase y 8 rapazos na cárcele por (asina lo recueye la sentencia) odiar a la Guardia Civil.
De magar entós, los sos familiares y compañeros van entamando abondes manifestaciones multitudinaries nes que cientos de miles de presones desixen, por agora ensin rempuesta, la so llibertá. L’asociación de families Altsasu Gurasoa vendrán a Asturies esti Xineru a cuntar la so situación y esclariar a los asistentes cualisquier duda sobre’l casu. Sedrán los díes 18 de Xineru en La Felguera (CSA La Xusticia) ya’l 19 en Xixón y Uviéu (Casa’l Pueblu y Llar la Llegra).
Redaición InfoAsturies
This work is licensed under a Creative Commons Attribution 4.0 International License.
