La nueva revisión del padrón municipal a fecha d’un de Xineru torna a amosar un saldu negativu: 6.716 asturianos menos d’un añu pa otru, averándomos pelligrosamente a la llende del millón d’habitantes. Por agora, vivimos n’Asturies 1.028.244 persones
Con esti son esautamente diez años (de magar el 2.008, cuando ganemos 10 habitantes) los que lleva Asturies en númberos colloraos en materia de población, y les previsiones namás apunten a peor: l’aisllamientu progresivu, el desaniciu de la minería, la industria, la naval, la pesca ya’l campu, la falta de servicios y comunicaciones, especialmente na fastera rural, les cargues fiscales y un llargu etcetera de despropósitos debuxen un escenariu que ye dificil ver comu casual. Averámonos al millón, y la velocidá de cayía increméntase col tiempu.
Los datos por conceyos son los de xineru de 2.018, ya que se revisen con un añu d’antiguedá, pero teniendo en cuenta les sos cifres (les úniques disponibles de manera oficial) Namás 7 conceyos salven de la sangría: Santu Adriano ganó diez moradores, Caravia, Illas y Ribadedeva ganaron cinco ca ún, Sariegu dos y Nava ún, entantu que Yermes y Tameza quedó comu taba, con 140. Pente toos, 28 persones más.
Nos 71 conceyos restantes, incluyendo los grandes nucleos de población como Xixón (-545) y Uviéu (-281), perdieron xente, nun siendo quien a caltener les cifres nin siquiera a fuercia de la inmigración que carecen. Llangréu, con 545 persones menos y Mieres, con 534, sumen ya venti años perdiendo población. El pior datu, el d’Avilés, que perdió nun añu l’un por cientu de la so población, 799 avilesinos menos.
Como datu aneudóticu, Asturies pierde más homes que muyeres, colo que nos ta quedando un país mui femenín, con cuasi 50.000 muyeres más que paisanos.
Llucía F. Marqués
This work is licensed under a Creative Commons Attribution 4.0 International License.