Dende Iniciativa pol asturianu amuésense optimistes “ca añu que pasa va medrando’l númberu de noticies positives”, declaró Inaciu Galán, presidente d’Iniciativa pol Asturianu, na presentación de la campaña ‘Meyor noticia pal asturianu en 2018’. Precisamente esi ye un de los finxos d’esti eventu, facer aportar a los asturianos y asturianes delles noticies pal nuesu idioma, pa que puedan decatase de “cómo l’asturianu va ganando espacios y apoyos na sociedá”.
El presidente d’Iniciativa pol Asturianu apuntó que “con esta campaña pretendemos facer llegar a los asturianos y les asturianes delles bones noticies pal nuesu idioma y treslladar que l’asturianu va ganando presencia, normalidá y apoyu na sociedá. Realidaes como que 60 de los 78 conceyos tienen aprobada la toponimia tradicional, qu’un ex presidente d’España apoye per primer vegada la oficialidá del asturianu o que’l Rector de la Universidá d’Uviéu eche una conferencia n’asturianu son una amuesa clara de qu’esta llingua tien futuru”.
Esti añu son na menos que 35 bones noticies pente les qu’habrá qu’escoyer la meyor: sofitos públicos, toponimia, campañes en redes, visites y esposiciones, llibros asoleyaos, el reconocimientu masivu de los casos d’asturfobia y discriminación llingüística, la implicación de la universidá, manifestaciones y protestes populares en defensa del asturianu… un añu movíu nel que’l Pueblu Asturianu dexó nidios los sos pruyimientos, pero que, sicasí y pesi a toles promeses y semeyes pa la galería de los estremaos grupos políticos de los que depende, nun mos traxo la única noticia pola que vraeramente naguamos: la de la Oficialidá.
naciu Galán terminó diciendo que “los y les participantes pueden escoyer ente un total de más de 35 bones noticies pal asturianu de diferente tipu, pudiendo seleccionar hasta 10 al mesmu tiempu”.
Quien quiera participar va tener qu’apurase: la votación va tar abierta fasta’l domingu 13 de xineru ya’l llunes 14 daráse a conocer la llista de meyores noticies de 2018.
Nuria Prendes
This work is licensed under a Creative Commons Attribution 4.0 International License.
