Disconformidá y refugu de los trabayadores énte la nueva prórroga d’ERE que la multinacional del aceru vien de roblar por otros 3 años más

ArcelorMittal enllarga dica’l 2021 l’ERE que tien en marcha nel conxuntu de plantes en tol estáu. Na filial avilesina esta ampliación vien acompangada del anunciu de que se van aplicar más díes sueltos d’ERE en distintes llínees de finishing: Decapáu, Tándem 2, Llimpieza Lleutrollítica, Recocíu Continuu, Temper y Llata 2. El sindicatu CSI denuncia que, como vien siendo avezao, esti amenorgamientu aplícase ensin especificar perdes nin siquieramente previsión d’elles, desllexitimándo más si cabe l’usu que se ta faciendo del ERE”.

De magar la espublización d’esta prórroga, dellos sindicatos d’estremaos puntos del estáu axuntáronse p’aldericar la situación na que s’atopen los trabayadores y roblar un comunicáu de refuga a la mesma, nel que destaquen l’usu de los trabayadores comu moneda de cambeu nes sos negociaciones y lo inapropiao del usu d’una erbía comu un ERE nuna empresa colos millones de beneficios y la carga de trabayu que tien ArcelorMittal.  De siguío trescribimos les sos pallabres:

“Dende los sindicatos CGT, ESK, LAB y CSI n’ArcelorMittal queremos amosar el nuesu refugu énte l’ERE que la multinacional tien abiertu pal conxuntu del grupu ArcelorMittal n’España, y que nuevamente vien de prorrogar por 3 años más.

Queremos enfear la falta de compromisu qu’esta deshumanizada multinacional tien colos que trabayamos nes sos factoríes, pa la que somos meres unidaes de producción, a les qu’estrumir n’ares de los sos acobiciaos beneficios multimillonarios, desixendo aumentar cargues de producción en toles factoríes y talleres mientres s’aplica un nuevu plan de productividá, que nun significa otra cosa que retayar personal al másimu en toles istalaciones.

L’oxetivu de la empresa cola implantación d’esti ERE nun foi otru que’l llograr la mayor rentabilidá económica en tiempos de crisis, valiéndose del nuesu desemplegu, que gastemos les nueses prestaciones en favor de la multinacional, mientres se financien de les arques públiques pa siguir ganando dineru asgaya.

Con esti ERE somos meros rehenes, que la multinacional del aceru usa pa primir cuando-y ye necesariu, yá seya pa falar de la tarifa lléutrica, del mercáu del CO2, del dumping chinu, o pa llevar a cabu cualquier tipu de negociación tanto de conveniu, comu de taller… somos la moneda de cambéu qu’utiliza pa primir a gobiernos a tolos niveles, pa que llexislen a la so midida y pa llantar la política del mieu.

Pa cuelmu hai quienes faciliten a la empresa esta ferramienta de chantaxe que ye l’ERE, que venimos careciendo dende 2009. Nun queremos entrar a valorar aquel momentu nin aquella negociación, pero sí, que dende entós se venga roblando añu tres d’añu, prorroga tres prorroga, ensin cuestionase l’ataque que representa pal conxuntu de les plantiyes, ensin cuestionase qu’esti ERE nun se correspuende cola situación actual real de la empresa, nin coles necesidaes que tien, qu’aumentó les cargues de trabayu en cuasi toles instalaciones al cien per cien de la producción y declarando millones de beneficios.

Poro, queremos xunir les nueses voces, por que en toles plantes qu’él grupu tien n’España, sé escuche una voz discordante, que resone bien alto que ye intolerable qu’una multinacional con millones de beneficios siga teniendo a la so disposición una ferramienta de chantaxe y presión como ye esti ERE.

Quiérenmos aisllaos y en soledá, van atopanos de mancomún.

Redaición InfoAsturies

This work is licensed under a Creative Commons Attribution 4.0 International License.