Ante les caberes declaraciones de Javier Fernández “El Mudu”, la organización nacionaliega acusa a los socesivos gobiernos del “Principado” de ser los responsables de les polítiques de desmantelamientu social ya económicu que causaron la despoblación

Que “El problema demográficu n’Asturies ye d’estrema gravedá” sábenlo bien los asturianos ya’l so presidente vien de reconocelo nes sos caberes declaraciones. Ocho llexislatures del PSOE, seies presidentes del mesmu partíu que mos foron llevando adulces a la situación socioeconómica d’emerxencia na que mos alcontramos -col gabitu de los dos presidentes de la drecha oficial, que gobernaron 5 años en total y colos que nun hebio grandes cambios de llinia-. Camín del millón d’habitantes y cola población más avieyao d’Europa, la emerxencia lleva años xestándose.

Recientes estudios espeyen que “Son necesarios 6.000 nacimientos al añu pa qu’Asturies entame a xorrecer”, pero la natalidá, mui a la contra, sigui una llinia descendente, cola población progresivamente más vieyo y escaso y la mocedá ensin medios pa emancipase -muncho menos formar una familia- “Nuna Asturies avieyada na que se fuercia a la mocedá a emigrar ye imposible qu’aumente la natalidá”.

Andecha Astur resume la responsabilidá de los socesivos gobiernos d’Asturies en cuatro rengleres “Desficiéronmos el texíu socio-económicu asturianu, esaniciaron la industria, minería, el naval, la pesca, el campu, condérguenmos a la precariedá y obliguen a la mocedá asturiana a emigrar y lluéu avísenmos que’l problema demográficu ye d’estrema gravedá. ¡Ellos, que son los cómplices del Reinu d’España! . Esto nun ye un “problema demográficu”, ye un xenocidiu anunciáu que tenemos que ser quien aparar pente toos y toes”

Pa la formación política, non solo ye preciso tomar midies que fomenten la natalidá (ello ye, favorecer l’acesu a la vivienda y a trabayos dignos de la mocedá) sinon que ye perimportante ufrir a les centenes de miles d’asturianos desplazaos -la mayoria con un perfil d’alta formación- la oportunidá de tornar al país, garantizándoyos el mediu de vida y qu’al tornar atoparán, non solo un trabayu, sinon los servicios, los drechos ya infracadarmes que s’esperen nun país desendolcáu del sieglu XXI.

Llucía F. Marqués

This work is licensed under a Creative Commons Attribution 4.0 International License.