Un conceutu d’homenaxe inspiráu nos “non cumpleaños” de Lewis Carrol

El centenariu de la nacencia de Valle-Inclán foi hai 50 años y entá falten 20 pal de la so muerte, pero da igual. El Círculu de Belles Artes (CBA) de Madrid decidió aniciar cola so figura un nuevu conceutu d’homenaxe inspirándose nos “non cumpleaños” de Lewis Carrol n’Alicia nel país de la Maravíes, de manera que cada añu realizará un homenaxe al marxe de les efemérides que marca’l calendariu. Namás va ser necesariu que l’autor o la obra cellebrada seya imprescindible y “merecedora de discutiniu constante”.

Valle-Inclán, mui venceyáu en vida al Círculu, va ser recordáu al traviés del cine, cola proyección d’una serie de películes rellacionaes cola so concepción del esperpento, y del teatru, cola representación a lo llargo de 8 hores siguíes de dos de les sos obres: La Marquesa Rosalinda y el Retablu de l’Avaricia, la Lluxuria y la Muerte.

Nel marcu d’esti eventu editóse Don Ramón María ‘El Manco’ y otros bohemios. Un llibru con dos autores: el mesmu Valle-Inclán ya Ignacio Amestoy. Del primeru recuéyese’l céllebre poema llargu La pipa de kif, asina como la pieza de teatru Ligazón. Auto para siluetas, que’l mesmu Valle-Inclán estrenó nel Círculu de Belles Artes cola so compañía, El Cántaru Rotu, el 19 d’avientu de 1926. Y del segundu, dos artículos: La revolución santa de Valle-Inclán, un percorríu pola vida y obra de Valle-Inclán, y Diecinueve ediciones de La noche de Max Estrella, na que da voz y espaciu a los sos múltiples protagonistes.

This work is licensed under a Creative Commons Attribution 4.0 International License.