La militancia d’Andecha Astur ta llamada a participar esti sábadu nun Conceyu Nacional nel que se tratarán cuestiones de gran emportancia pal futuru de la formación

La renovación de los cargos de direición y la redefinición de la llinia política del partíu son dos de los puntos fuertes nel orde del díi, pero la cuestión más relevante del conceyu ye quiciás l’alderique alrodiu del programa elleutoral qu’Andecha Astur presentará nes prósimes elleiciones, tantu nacionales comu de conceyu y europees. En pallabres de Mariu Arbesú “Nós nun acatamos un programa redactáu dende Madrid, nin aceutamos ciegamente unes llinies polítiques impuestes; somos nos, asturianos y asturianes, los que meyor conocemos los problemes del nuesu país y por tantu somos nos los que proponemos los caminos y soluciones pa, trabayando n’andecha, sacar el país alantre”. Del C.N saldrán tamién los nomes de les presones que se presentarán a les elleiciones nes tres convocatories, europea, nacional y de conceyu.

No que cinca a les elleiciones europees, presentaráse pa la so aprebación la participación d’Andecha Astur dientro la coalición europea “Agora Repúbliques”, entamada por ERC, EH Bildu y BNG como continuación de “Los Pueblos deciden”,  de la qu’Andecha ya formaba parte, y qu’acomuña formaciones d’estremaes nacionalidaes peninsulares ensin estáu.

Nel conceyu procederáse a la renovación de los miembros de la Xunta Executiva y a la presentación d’una fonda revisión de los sos estatutos que permita garantizar al másimu el furrulamientu democráticu y tresparente de la organización “con ello lo que buscamos ye ameyorar los drechos de la militancia, poniendo munchu enfotu en facilitar la participación de los asturianos desplazaos forciosamente, pero que comu asturianos que son quieren siguir participando na política del país”.

Arriendes d’ello, tamién se procederá a aprebar la llinia política pa los prósimos años, daqué fundamental p’adautase a los cambios políticos y responder a los nuevos pruyimientos de los asturianos “Dende Andecha Astur tamos afitando un proyeutu políticu de tresformación social que tien Asturies como marcu específicu d’actuación y qu’ufre una alternativa digna y viable de futuru pal Pueblu Asturianu”. El xorrecimientu de la militancia tamién fae preciso, sigún informó Arbesú, “Un esfuerciu estra pa garantizar la pluralidá interna que siempres definió esta organización, dientru d’unos puntos mínimos irrenunciables”.

This work is licensed under a Creative Commons Attribution 4.0 International License.