Va un mes de la muerte de Thiago, el neñu que s’empapizó con una uva a cien metros d’un cientru d’urxencies preslláu

Los medios ya dexaron de buscar culpables, otra llaceria lu desplazó, pero los sos collacios del cole siguen poniendo xuguetes nel semáforu al par del que dexó d’alendar, nun lu escaecemos.

Esperé tou esti tiempu pa dicir lo que pienso por respetu a la familia y por nun participar del circu mediáticu que tien nes desgracies ayenes un llamentable filón. Pero nun quería qu’esto quedare ensin dicir.

Thiago nun morrió por que se-y diere una uva: miles de rapacinos de tres y menos años comieron uves al mesmu tiempu esa nueche; de xuro ya comiere docenes d’uves y otres coses de carauterístiques asemeyaes (carambelos, mesmamente) ensin problema. Nun culpemos a la familia, que ya tien enforma: que s’empapizare foi cuestión de mala suerte, non neglixencia.

Tampocu morrió porque unos faltosos de folixa pasaren de llargu y nun apararen el coche ante la pidición d’aida; a ellos deseyo-yos tol remordimientu posible, pero el viaxe’n coche tampocu lu salvare, por munches llendes de velocidá que saltaren.

Muncho menos porque la so ma y la vecina nun fexeren un cursu de primeros ausilios y nun supieren facer la maniobra de Heimlich: una ma nun tien la obligación d’ello, seique seya bona idega.

El rapacín morrió a pocu más de cien metros d’un cientru de salú que, fasta l’añu 2.000, cuntaba con un serviciu d’urxencies abiertu tola nueche pero qu’el 31 d’Avientu del 2018 taba preslláu. El Cientru de Salú del Natahoyo, igual que dellos más en Xixón, careció dos retayos consecutivos, ún que-y quitó l’horariu nuechirniegu y otru, nel 2010, que baxó a les 20:00 la hora de preslle, quitando’l serviciu tamién los fines de selmana y festivos, cola propuesta enriba la mesa de quitalu tamién nes tardis.

A Thiago matáronlu los retayos en sanidá. Nun ye’l primeru nin sedrá l’únicu.

Llucía F. Marqués

This work is licensed under a Creative Commons Attribution 4.0 International License.