Nel alderique sobro l’Ária Metropolitana asturiana, Andecha Astur apuesta por correxir desigualdaes territoriales y recuperar la tradicional cadarma de “Poles”que vertebra’l país en tornu a dellos polos de desendolcu 

Dende la formación política nacionaliega reconocen la esistencia de lo que se pue considerar un ária metropolitana na fastera cientral d’Asturies y poro, la necesidá de qu’esta cunte con un tratamientu específicu adautáu a les sos necesidaes y al so pesu no que cinca a población, ya inclusu aprofitar les aídes estatales y europees a les que tendríe acesu, “pero ello tien de tar enartao nuna visión nacional d’Asturies, que contemple una articulación efeutiva de tol territoriu, y tien que cuntar con unes garantíes de transparencia, y un control económicu y democráticu que torguen qu’acabe siendo otru ñeru de financiamientu del PSOE y les sos redes clientelares; garantíes que fasta agora naide nun ta plantegando”.

Alerten tamién del pelligru de crear, col modelu propuestu, una fractura territorial n’Asturies na qu’esistirien fondes desigualdaes de drechos, servicios ya oportunidaes pente los -privilexaos- moraores de la fastera cientral y los que moren nes periferies, llonxe de la influencia d’esta ária metropolitana. Esto, alvierten, podría derivar nun efeutu llamada qu’agravaría más si cabe la despoblación de bona parte del territoriu del país, nun intre nel que’l desdexamientu de la zona rural ya contabiliza 880 pueblos abandonaos y otros 321 con un solu vecín.

Comu alternativa proponen la recuperación del tradicional modelu de “poles”, ello ye, reforciar dellos polos de desendolcu económicu ya industrial espardíos estratéxicamente pel territoriu nacional, “de forma que se corrixan les desigualdaes estructurales agora mesmo esistentes y se caltenga’l texíu socio-económicu tradicional asturianu” al tiempu que se tomen les midíes afayaíces pa meyorar los servicios nel ária metropolitana esistente.

Redaición InfoAsturies