“La sidra y la manzana”, del arxentín Adolfo Loyola, foi la obra ganadora d’esti certame, nel que participaron 92 autores de 25 países estremaos, presentando un total de 310 semeyes
Güei a les 20:00 hores tendrá llugar en la sidrería La Galana de Xixón (Plaza Mayor, 10) la entrega premios del XII Concursu Semeyes LA SIDRA, certame entamáu pola revista LA SIDRA y l’Asociación Asemeyando; y qu’amás cunta col padrociniu del llagar JR y col sofitu de la citada sidrería.
El pasáu 28 xineru féxose públicu’l fallu del xuráu. El primer premiu foi pa la semeya “La sidra y la manzana” d’Adolfo Loyola procedente d’Arxentina, que recibirá 700 € y medalla d’oru de la CEF. El primer accésit, dotáu con 200 € y medalla de plata, recayó n’Arturo Rodríguez Ortiz, d’España, que participó con “El nadador”. El segundu accésit -100 € y medalla de bronce- foi pa “Pomum Tributum 1”, tamién d’España y realizada por Antonio Farto Casado. Pa finar, el premiu especial qu’otorga’l llagar JR recayó nel asturianu Óscar Chamorro Flórez y la so istantánia “Bodegón”, que sedrá premiada con dos caxes de sidre JR.
Participará na entrega premios el conceyal de Turismu, Esportes, Festexos y Mocedá de Xixón, Jesús Martínez Salvador; tamién el presidente de la Federación Asturiana d’Asociaciones Fotográfiques, Luis José Vigil-Escalera; y la secretaría y l’encargáu de les Bienales de Fotografía, Marta Menéndez y Pedro Gutiérrez.
La entrega premios tamién sedrá l’escenariu pa la naguración de la esposición del Concursu Semeyes LA SIDRA que tará compuesta poles meyores 20 obres presentaes al certame. Nun primer momentu podrá visitase na sidrería La Galana, darréu treslladaráse a otros establecimientos yá que l’amuesa sedrá itinerante. Los asistentes al actu recibirán, amás, una etiqueta comemorativa.
Con doce años de antiguedad, el Concursu Semeyes LA SIDRA ye’l certame fotográficu más antiguu de los que tienen la bébora emblemática asturiana como temática principal. Amás ye de los pocos d’esta triba certames nel que nun se cobra a los fotógrafos por entrar a participar.
Redaición InfoAsturies
This work is licensed under a Creative Commons Attribution 4.0 International License.
