El sindicatu d’enfermería SATSE ta faciendo una recoyida de robles pa que’l Congresu debata una llei que garantice un númberu másimu de pacientes por profesional
N’Asturies cuntamos con menos de 6 enfermeres por cada mil moraores, frente a los cuasi 9 profesionales por mil que tien de ratio el restu d’Europa. Poro, p’algamar la media de la XE son precisos otros 2.455 enfermeros/es. Sigún el sindicatu, la falta de personal ocasiona al mesmu tiempu una falta d’atención pa los pacientes y un escesu de trabayu pa los profesionales, lo que prevoca riesgos de seguridá y un mayor absentismu llaboral.
Pa finar con esta situación, dellos miembros de SATSE, recoyeron robles na Plaza’l Fontán, n’Uviéu, reclamando al Congresu los Diputaos l’apertura d’una Iniciativa Llexislativa Popular que garantice por llei un númberu másimu de pacientes por enfermeru o enfermera que permita ufrir una atención sanitaria de calidá. La iniciativa ye parte d’una campaña d’información del SATSE cola que quieren aumentar les plantiyes sanitaries, baxo’l llema “La Sanidá que merecemos. Llei de ratios enfermeres”
Nuria Prendes
This work is licensed under a Creative Commons Attribution 4.0 International License.
