La propuesta presentada por Andecha Astur pidi abrir un alderique en plenu del Conceyu sobro la determinación de responsabilidaes pola costrución del Hospital Francisco Grande Covián en tarrenes inundables del conceyu Parres
Na fase de conceición y diseñu l’Hospital Francisco Grande Covián, naguráu oficialmente nel 1998, yá hebio un gran alderique sobro la conveniencia d’asitialu nel barriu Castañera, en plena ribera’l ríu Piloña. Foron milenta les voces qu’entós señalaron el pelligru de llevantar un hospital en tierres de crecía del calce fluvial. Sicasí, toles alministraciones dieron el so vistu bonu y los sos permisos pa la costrución del hospital nestes condiciones.
De fechu, el tarrén ya apaecía catalogáu comu inundable na cartografía del entós Ministeriu español del Mediu ambiente, siendo amás calificada la so fastera con indiz de riesgu por inundación nivel 3, siendo 4 el másimu, por un estudiu del Istitutu de Recursos Ñaturales y Ordenación del Territoriu(Indurot), de la Universidá d’Uviéu. Anantes de la so naguración, tolos especialistes coincidieron, en que, en dengún casu, se debiere d’autorizar la so costrución en plena vega d’inundación del ríu Piloña.
Poro, Andecha Astur propón al Plenu’l Conceyu Parres qu’entame iniciatives polítiques y llegales pa depurar les posibles responsabilidaes de los alcaldes de Parres, presidentes del “Gobierno
autonómico” d’Asturies y conseyeros de Sanidá d’Asturies que tuvieron implicaos na planificación y costrución del Hospital.
La idega de costruyir un nueu hospital surdiere como un pautu PSOE/UCD en 1981, siendo alcalde de Parres Emilio Pando (PSOE) y presidente del “Consejo Regional de Asturias” Rafael Fernández (PSOE) y con Javier Vidal comu Conseyeru Sanidá (entós na UCD, güei en Ciudadanos) continuando depués de la man de Manuel Alonso Nieda (PSOE), alcalde ente 1983 y 1991.
La costrución llevóse alantre tres d’un turbiu intercambiu de perres y tarrenes, nel que’l conceyu de Parres pidió un créitu millonariu p’afrontar el pagu de los 28 millones de pesetes que se pagaron a 3 vecinos polos 40.000 metros cuadraos de tarrén inundable, pa recalificalos darréu comu costruyibles y cedelos al “Gobierno autonómico”, presidíu por Pedro de Silva (PSOE) y con Juan Luis Rodríguez-Vigil (PSOE) comu conseyeru Sanidá.
Entamó la so andaura con forma de Fundación privá con fondos públicos, siendo socios fundaores el “Gobierno del Principado”, el Conceyu Parres, la mancomunidá del Oriente y dellos particulares, entamando a furrular el 2 de xunu de 1997 y nagurándose oficialmente’l 8 de xunu de 1998, pa ser incluyíu comu hospital públicu xestionáu pol SESPA nel 2008, tres una larga llucha social, magar la total oposición del Gobiernu’l PSOE presidíu entós por Vicente Álvarez Areces.
Dende la so apertura l’hospital yá sufrío abondos episodios d’inundaciones y varios d’evacuación y clausura por esti mesmu motivu, llegando a dase’l casu nel 2010 de tener qu’evacuar 70 enfermos en llanches, ensin que se tomaren midies pa torgar la repetición d’estes situaciones.
Pente les entrugues plantegaes por A.A. inclúyense cuestiones sobro’l presupuestu públicu destináu a l’aplicación del plan de prevención d’inundaciones en Les Arriondes, paralizáu de magar el 2015, asina comu la fecha de la so reautivación efeutiva.
Redaición InfoAsturies
This work is licensed under a Creative Commons Attribution 4.0 International License.
