La Plataforma pola salú y la Sanidá Pública d’Asturies sofita la ellaboración d’un nuevu Plan de Salú, pero resabia de la so efectividá y echa en falta la recoyida de numberoses reivindicaciones ciudadanes nel mesmu
Pa la Plataforma, esti plan ye una iniciativa necesaria pa reorientar y evaluar les polítiques públiques correspondientes al sistema sanitariu, de manera que estes garanticen la equidad en salú y la proteición y la promoción de la salú individual y colectivo nel país. Sicasí “ensin ánimu de restar méritos al documentu, que ye un manual estensu de múltiples problemes ya hipotétiques intervenciones”, manifestaron importantes desalcuerdos col mesmu.
Un de los principales puntos de desalcuerdu ye la falta de concreción y compromisu d’execución de les propuestes numberaes, cola consiguiente falta d’operatividá, y nesi sen recuerden que nun tamos énte’l primer Plan de Salú asturianu. Nel pasáu promulgóse’l “Plan de Salú p’Asturies 2004-2007. La salú como horizonte” y con posterioridá aprobáronse otres encuestes ya informes como l’Informe de la situación de salú n’Asturies 2.012- 2.015 ” o’l “Plan de salú p’Asturies 2018/2028, poblaciones sanes, persones sanes”, planes ya iniciatives de los que nun hai constancia d’evaluación nin de la so eficacia, lo que fai tarrecer a la Plataforma pola Salú y la Sanidá Pública d’Asturies que teamos ante una nueva iniciativa que nun tea incidencia dalguna na práutica.
Per otra parte, echen en falta que se recueyan munches de les reivindicaciones, referíes a la salú, de los movimientos sociales d’Asturies. La falta de participación ciudadana torga, según la plataforma, tomar midíes concretes y reales. Asina, nun se tuvieron en cuenta les opiniones formulaes dende la Plataforma d’Afeutaos pola Hipoteca a la de valorar daqué tan determinante pa la salú como l’accesu a una vivienda digna y saludable. Les polítiques públiques tienen d’arreyar, faer participe y tresferir poder, a toles persones a les que sirven. La participación ciudadana “ye un aspeutu nuclear na conceición de cualisquier Plan de Salú y pa ello, entendemos dende la Plataforma, precísense cambeos estructurales fondos y nueves formes de compromisu ente les instituciones, d’una parte, y la ciudadanía y los movimientos sociales, d’otra”.
La propuesta que faen pa correxir la falta d’oxetivos y compromisos concretos d’intervención dende les distintes instituciones del Gobiernu en collaboración cola Conseyería de Conseyería de Salú y la participación de la ciudadanía ye la constitución de meses sectoriales qu’axunten a l’alministración con tolos actores sociales implicaos y col sofitu d’espertos reconocíos.
Proponen tamién que s’evite la repetición d’estudios de los que yá esisten datos actualizaos, y que’l Plan determine una rede de xixilancia y alertes sensibles de la equidad y los determinantes sociu-económicos, de xeneru, medioambientales y otros qu’interesen a la salú.
Dende la Plataforma pola salú y la Sanidá Pública Asturiana faen un llamamientu a tolos movimientos sociales a que participen coles sos propuestes y allegamientos, una y bones “la salú ye tresversal ya interesa a tolos movimientos sociales con independencia del ámbitu en que participen, y el Plan de salú ye un bon exemplu a esti respectu y una bona ferramienta pa desendolcar formes de confluencia ente los distintos movimientos y organizaciones sociales”.
Llucía F. Marqués
This work is licensed under a Creative Commons Attribution 4.0 International License.
