La falta d’impulsu fiscal, l’ausencia de polítiques de creación d’emplegu non precariu, l’avieyamientu de la población y la situación previa de desaceleración son dalgunos de los parámetros apuntaos pol estudiu del BBVA comu causantes d’esta situación

Acordies l’estudiu ellaboráu por BBVA Research, Asturies torna quedar na cola de xorrecimientu económicu, consumu y creación d’emplegu l’estáu, empiorando les ya llacerioses previsiones. El conceutu de “desaceleración”, mui sentíu esti añu referíu al esperáu frenazu nel xorrecimientu económicu, nun ye aplicable nel casu de la economía asturiana, que nun llegó a “acelerase”.

El xorrecimientu económicu n’Asturies sedrá, nel meyor de los casos, d’un 2’1% nel añu que vien d’entamar, cinco décimes perbaxo de los pesimistes 2’6 que se pronosticaren primeramente, contrastando cola recuperación visible del estáu español y más concretamente, colo que puede apreciase en tola costa norte. Namás les Islles Baleares y Murcia acompanguen a Asturies nesti escenariu de descensu, seique por pocu tiempu, ya que les Baleares anuncien un xorrecimientu emportante del nivel d’emplegu pa esti añu que l’allugaría nun futuru prósimu en puestos meyores.

No que cinca al emplegu, la continua perdida de trabayu paez nun tener vuelta atrás, esperándose un xorrecimientu d’un escasu 1’1% (frente al 3’5% por exemplu de les Baleares) ya ensin meyores previsibles, sinon al contrariu, no que cinca a precariedá y temporalidá. Esti fechu incide direutamente nel tercer parámetru midíu nel estudiu: la capacidá de consumu.