El gobiernu de Jersey vien d’aprebar la oficialidá de la llingua nativa de la Islla, que sedrá oficial xunto col inglés ya’l francés

El Jèrriais ye una forma de la llingua normanda que se fala nuna islla británica cercana a la costa oeste francesa, en riesgu de desaniciu nel sieglu pasáu cola incorporación progresiva del inglés como llingua principal na educación, el comerciu y l’alministración. Anguañu cuenta con perpoques persones que la tean comu llingua materna siendo principalmente falada poles persones de mayor edá, pero los esfuercios de la población ya’l so gobiernu por recuperala tan dando emportantes frutos.

La cabera bona noticia ye la decisión del gobiernu de Jersey d’otorga-y a la so llingua la condición d’oficial en tol so territoriu, xunto col inglés ya’l francés, lo que permitirá una serie de cambeos que dignifiquen y espardan esti idioma, torgando’l so desaniciu.

Pente otres cuestiones, los cambios afeutarán a tola documentación alministrativa ya escritos oficiales del seutor públicu, que tendrán d’incluyir los testos en Jèrriais, asina comu a toles señalizaciones de la islla.

Los responsables de llevalo a cabu alvierten que, por mor de l’amplitú y fondura de les nueves normatives, l’aplicación del cambeu sedrá gradual, cuntando con un plazu de cuatro meses pa xenerar les llinies guía d’aplicación de la nueva llexisllación llingüística.

This work is licensed under a Creative Commons Attribution 4.0 International License.