Mañana xueves 21 de febreru a les siete la tardi saldrá de la Ilesia de Fátima, en Xixón, el manifestamientu que percorrerá les cais del barriu, cientrándose nesti porque “ye un espeyu de tolos problemes que tien Asturies: un barriu obreru, emprobecíu y contamináu”
La zona Oeste de Xixón, colos barrios de La Calzada, El Natahoyo, El Cerilleru y Fátima, lleva décades siendo la más castigada pola contaminación, al mesmu tiempu que, pol so calter tradicionalmente obreru, ye la fastera que más carez los problemes derivaos de la crisis y precarización llaboral, siendo los principales afeutaos pola reconversión naval ya’l progresivu preslle de la prautica totalidá de les munches factories que dieren vida a la zona. Comu consecuencia, l’acesu a servicios básicos, comu la lluz o’l gas, ya nun ta garantizaos pa munchos ciudadanos. Ello desplica l’ecléticu llema d’esta concentración, que xune nuna única protesta los mayores esmolecimientos de los convocantes: contaminación, desemplegu, coste de la vida.
Estos barrios son tamién conocios pola so capacidá revindicativa, siendo escenariu de movilizaciones hestóriques, tradicionalmente de calter llaboral y que, nos caberos años, ciéntrense especialmente na reclamación d’un aire respirable, ante’l grave espoxigue de la contaminación ya l’incrementu de persones con enfermedaes derivaes de la mesma.
This work is licensed under a Creative Commons Attribution 4.0 International License.
1 Comment Already