¿U les perres d’Asturies?

21 Febreru, 2019

Nun tan tolos que son, pero son tolos que tan: facemos un repasu per alto de dalgunos de los proyeutos pantasmes nos que se marafundiaron les poques perres que nun colaron pa Madrí o pa los bolsos de la Mafia Asturiana. Semanalmente diremos desglosando caún de los casos con mayor detalle

Les Redes Clientelares, colos sos intercambios estraoficiales de favores a cambiu de sofitos elleutorales, complicidaes y silencios, son cares de caltener, sobro tou si son tan amplies comu les del PSOE n’Asturies. Pa cubrir los sos gastos ye imprescindible cuntar con una bona escusa oficial y pa ello, na meyor que les obres pantasmes: nesti tema los socesivos gobiernos del “Principado” y d’abondos conceyos vienen amosando un maxín namás comparable col enfotu puestu polos ciudadanos en nun querer ver lo que pasa delantre los sos güeyos.

Esclariar, anantes de tou que les cifres son aprosimaes, por ser en dellos casos abegoso dar cola información completa de los costes. En casu de dulda, tiense en cuenta siempres la cifra más discreta y nesti resume nun se tienen en cuenta coste de caltenimientu, xestión y reparaciones. Somos coscientes de que falten abondos marafundios, pero estos son abondos pa facese una idega de la situación.

Pa entamar el repasu, imprescindible mencionar los marafundios y robos xudicialmente reconocios, como ye’l casu del Xeriátricu de Felechosa, con un presupuestu de 31 millones d’euros, ya’l Niemeyer d’Avilés, con otros 44 millones, y van ya 71.

No que cinca a emportancia económica, cabe destacar los fondos destinaos a grandes proyeutos paralizaos dafechu, comu’l tunel del Metrotrén y la Regasificadora, con 106 y 480 millones d’euros respeutivamente, y ya tenemos 657 millones.

Depués d’esti, el separtáu más “xugosu” ye’l que correspuende a “inversiones ensin usu”, ello ye, proyeutos millonarios que, o enxamás llegaron a furrular, o que tienen un usu y una rentabilidá mínima. Destaquen pente ellos Polígonos industriales (de vital importancia, si furrularen, pal desendolcu’l país), con un total de 315.430.000 €, destacando el casu de Zalia y Bobes, que con 200 millones invertios nun cuenta siquiera con accesos. Sicasi, el mayor númberu d’estos proyeutos correspuende a museos, cientros d’interpretación y asemeyaos, de los que once tan presllaos dafechu y los otros malpenes son visitaos, presentando en munchos casos condiciones llamentables, o direutamente cayendo. El presupuestu invertíu nos 16 casos recoyios algama los 68.570.000 €, colo que sumando todo algamamos la guapa cifra de 1041 millones d’euros. Sumamos otros dos y mediu de les piscines de Caborana y Castropol, que nun llegaron a usase enxamás y tenemos un marafundiu de 1043’5 millones.

Especialmente dolioso ye’l casu de los equipamientos mélicos que nun llegaron a usase, comu nel casu del Cientru de recuperación pa enfermedaes neurolóxiques, qu’enxamás abrió y que perdió fasta’l drechu a nomase Stephen Howkings por pura desidia, depués de más de trece millones invertios nelli. Lo mesmu que’l cientru de Discapacitaos d’Avilés. Con ellos son ya son 1217’5 millones d’euros.

Otra estaya a considerar dientro d’esti allorie millonariu son los sobrecostes n’obres públiques, concedies a collacios por presupuestos prgresivamente inflables, de los que vamos cuntar 161 millones, dexando a un lláu el polémicu casu de El Musel, tamién en manes de la xusticia. Total, 1378’5 millones d’euros.

Los otros conceutos presentaos nesti resume incluyen hospitales animales, inversiones empresariales, oservatorios ornitolóxicos y albergues de pelegrinos, sumando 30’5 millones, 1409 millones d’euros.

Aparamos de cuntar. Acabamos de dar un repasu a más de mil cuatrocientos millones d’euros de les arques públiques asturianes esbardiaes. Sabemos que son munchos más. Estos datos dan, cuando menos, una pista de porque Asturies ye un casu únicu a nivel europeu no que cinca a la conxunción de despoblación, retrasu na recuperación económica ya indiz de probitú. Robáronmos.

Redaición InfoAsturies