Mariano Suarez

Abúltamos lóxico que’l PSOE convoque elleiciones anticipaes dende la ponte mandu d’esi Estáu español nel que se turnen les dreches españoliegues (PSOE y PP). Dempués de qu’estropiaren tolos caminos posibles y los dexaren enllenase cotolles, namái-yos quedaba llibre esta ruta d’escapá: les urnes

Énte esta situación, dende Andecha Astur anunciamos que va trabayase d’equí al mes d’abril porque se puea entamar una candidatura al Congresu y Senáu españoles comu la que formaron recién pa les elleiciones Europees, col nome “Agora Repúbliques”, y na que tan con ERC, EH Bildu, BNG y otres formaciones canaries y aragoneses. Ello ye: la suma d’esfuercios de tolos pueblos del Estáu que nagüen por un modelu socialista y democráticu, la defensa’l drechu al autodetermín, la xusticia social, l’acabu la corrución y un futuru dignu pa les asturianes y asturianos na so propia patria.

El réxime vixente del “Reino de España” lleva 40 años (tantos comu Franco) carauterizándose pol trespasu amable de poderes ente la drecha lliberal, que llidera’l PP (enantes CDS, AP), y la drecha socialdemócrata, representá pol PSOE (a vegaes col sofitu d’Iu y agora de Podemos). Pero la verdá ye que’l “turnismu” ta dexando ser garantía dala pa esti réxime surdíu en 1978, pa esta monarquía parllamentaria, pa esti nueu preséu de los Borbones y la so “España”. Les consecuencies sociales, económiques y mediuambientales que causen los nueos rumbos del capitalismu xabaz, insufribles pa les clases populares y obreres. La presencia ca vegá más desnuda de lo que representa un réxime de politicos enquistaos nos cebaeros y na corrución. La imposibilidá d’una participación popular rial nel determín del nuesu futuru. La ñegación d’horizontes de futuru pa que la población, especialmente la mocedá, siga vinculao a los sos territorios tradicionales. El recorte progresivu de llibertaes democrátiques y de drechos llaborales y sociales. La ñegación ca vegá más agresivo de les estremaes identidaes nacionales y l’amenorgamientu forciáu de les sos cultures y llingües (casu cimeru ye la ñegación de la oficialidá pa la llingua d’Asturies). La pervivencia d’un modelu social pratriarcal, machista y violentu. L’evidente podrigañu de les enteteles del estáu (corona, gobiernu, sirvicios de “intelixencia”, gran empresariáu, xudicatura, sirvicios policiales, mafies de varies tribes…). Y tantes otres razones… Too ello fae que l’Estáu español, en procesu descomposición, se mos presente comu un ente esfarrapáu y al debalu que, por turnos, PSOE y PP faen por alitar y endrechar.

Debío a la falta d’eficacia que los dos “turnistes” amuesen pa caltener un Estáu fuerte y xuníu ente les naciones y los pueblos que retién n’el, y rentable pa les élites polítiques y económiques, éstes faciliten una reagrupación táutica de fuercies. Ési ye’l motivu pol qu’entamen a salir de les fileres de los “turnistes” aquellos que defenden les posiciones más montunes y autoritaries. Éstos, axuntaos bonamente coles tropes más ortodoses del Valle los Cayíos, entamen agullar otra vegá nel monte. Son agullíos nueos sólo porque llevaben años amatagaos tres los partíos “turnistes”, namái que por motivos d’oportunismu táuticu. Pero’l so oxetivu ye’l de la ultradrecha de tola vida: amedranar los rebaños pa caltener el réxime español de 1978 y los beneficios políticos y económicos que d’ello remana’l gran capital.

Per un llau, el bloque reacionariu del PSOE, antiasturianu de carné, socialdemócrata namái de nome y corruptu d’oficiu. Un PSOE que sólo pue aspirar a daqué si cunta, comu suel asoceder, col sofitu de los sos pigarres habituales: IU y Podemos, dos muerganizaciones que yá demostraron abondes vegaes el so antiasturianismu, la so falta compromisu pa gobernar con y pal pueblu y la so falta puxu pa defender un modelu auténticamente democráticu y socialista.

Per otru llau, la hidra cuatricéfala y totalitaria a la que dan vida PP, Foro, Ciudadanos y Vox. Los niveles de testosterona antiasturiana, antisocial y antidemocrática d’esti bandu coméntense tamién por sigo mesmos.

Asturies nun pue esperar de nengún de los dos bloques una política democrática, social, antiaustericida, popular, asturiana, soberanista, antipatriarcal, tresparente… Asturies nun pue aceutar el chantax de vese obligá a escoyer ente lo malo y lo pior. Nun podemos entrar nel xuegu perversu d’escoyer ente dos formes de pena másima. Asturies tien d’apostar por sigo mesma, porque rialmente’l so futuru ta nes sos manes, nes tos manes.

¡República Asturiana!

This work is licensed under a Creative Commons Attribution 4.0 International License.