Comu prometimos, vamos facer breve repasu a dalgunos de los proyeutos ruinosos nos que se marafundiaron (y marafundien) los fondos públicos asturianos. Un d’estes macrocadarmes de presupuestu millonariu y rentabilidá nula ye la Zona d’Actividaes Lloxístiques ya Industriales d’Asturies (ZALIA)
El proyeutu ñació llentu: xestóse nel 2005 y la primer piedra colocóse n’Avientu del 2010, baxo l’auspiciu de la es-alcaldesa de Xixón pol PSOE, Paz Fdez Felgueroso, los presidentes de les autoridaes portuaries de Xixón y Avilés y, como non, del fináu Vicente Álvarez Areces. Nel 2019, con más de 100 millones d’euros invertios, continúa ensin tener accesos nin viabilidá económica.
Propiu del grandonismu ineficiente que carauteriza al gobiernu d’Asturies (del que tenemos otra amuesa na futurible “Aria Metropolitana”) , ZALIA prometía”Ser la plataforma llíder del noroeste, posicionando a Asturies comu l’exe fundamental del Arcu Atlánticu, impulsando la creación y desendolcu industrial d’Asturies”. Asina se vende la Zona d’Actividaes Lloxístiques ya Industriales d’Asturies (ZALIA). La realidá ye bien otra: cinco años depués de finalizaos los trabayos d’urbanización de los 700.000 metros cuadraos de la primer fase, namás ASETRA, la patronal asturiana del transporte por carretera, mercó una parcela, mentres que la falta de comunicación y los problemes col soministru llétricu allonxen posibles interesaos. Les caberes tasaciones baxen el preciu de les parceles dende los 140/170 aniciales a un preciu de venta de 60 € el metru cuadráu, perbaxo del coste que tuvo pa les arques públiques la compra de los tarrenos y la so urbanización.
El caberu golpe al polígonu aportó el pasáu mes de Xineru cola prohibición de continuar coles obres, ya aniciaes y nes que s’invirtiere mediu millón d’euros, pa iguar un acesu dende la “Y”, por mor del dictame del Ministeriu de Fomento, que considera que “nun cumpliría la normativa vixente y afeutaría a la seguridá vial”.
La falta d’información qu’esiste no que cinca a la so xestión nos caberos meses fae medrar la inquietú, y la páxina web de ZALIA da una idega clara de la so situación actual, más polo que calla que polo que cuenta: les caberes cuentes añales presentaes son les del 2016, cuando se recoyía una perda de 10’28 millones d’euros, colo qu’acumulaba va dos años unes pérdides de cerca 20 millones y un pasivu financieru de 104’16 millones más; les caberes noticies recoyíes, del 2015 y la estaya de “Proyeutos” apaez vacía. Pente los atrautivos (qu’entá güei) anuncien na so páxina, apaez precisamente la so “bona comunicación”, especificando la fantástica oportunidá que representen la -inacabada- Variante Payares, la -paralizada. Autopista del Mar, les -llacerioses- conesiones por ferrocarril y la -anulada- conesión pola “Y”.
La financiación d’esti fiascu repártese pente’l “Principado”, l’Autoridá Portuaria de Xixón y Avilés, el Conceyu de Xixón ya’l d’Avilés, seique recientemente el “Principado” anunció que nun se plantega apurrir más avales o préstamos pa sacar alantre esti polígonu, malque hai problemes incluso pa pagar los préstamos y les espropiaciones feches.
Redaición InfoAsturies
This work is licensed under a Creative Commons Attribution 4.0 International License.
