CSI recuerda a tolos homes y muyeres que quieran participar na fuelga del 8M que, en contra de lo que puede paecer nel comunicáu robláu polos tres sindicatos, UGT, CCOO y USO, la fuelga ye de 24 hores y tien cobertura llegal, llamando a participar na mesma y nes movilizaciones convocaes pa esi díe

Nos conceyos de comité d’Arcelormittal de Veriña y Avilés del 1 de marzu tres de los cuatro sindicatos participantes apautáronse en facer una convocatoria qu’estorbe lo menos posible a la empresa, obviando la convocatoria llegal de fuelga de 24 hores y acoyéndose a la versión más “light” de la fuelga en defensa de los drechos de les muyeres, la que sofita la patronal y que consiste nun parón simbólicu d’un par d’hores por turnu o xornada, invisibilizando l’efeutu de la mesma y faciendo que nun tenga consecuencies económiques pa la empresa.
Dende CSI pescancien qu’esta postura atenta direutamente contra la ética sindical y fomenta l’esquiroléu a base d’engaños y medies verdaes que desvirtuen la protesta.
Esta Fuelga Xeneral nun ta promovida polos sindicatos, sinón que son estos los que dan cobertura llegal a la pidición fecha pol movimientu feminista, que convoquen la fuelga de 24 hores. La postura de UGT, CCOO y USO reduz la protesta a una cenciella semeya pa la galería, ensin conteníu revindicativu y esparde la desinformación.

Nuria Prendes

This work is licensed under a Creative Commons Attribution 4.0 International License.