N’Asturies hai milenta razones más pa reivindicar dende la llucha feminista: la falta d’oportunidaes, la emigración forciada, les carencies nos servicios sociales, n’educación y sanidá que carguen a les muyeres de responsabilidaes como curiaores ensin escontraprestaciones…

El partíu asturianu vien de llanzar un comunicáu nel que reconoz que’l feminista ye’l movimientu social más dinámicu del sieglu XXI, “que ta algamando poner na axenda política les estremaes lluches que llideramos les muyeres nel ámbetu social, económicu, cultural, científicu, domésticu… la visibilidá de les muyeres que carecen la violencia de xéneru, la precariedá llaboral, les desigualdaes salariales, ect…”

Pero recalquen que n’Asturies a ésto amestamos milenta motivos más pa reivindicar nesti díi. Tolos problemes que carez la nuesa sociedá golpéen con más fuercia a les muyeres, les más afeutaes pol paru ya’l trabayu precariu, les qu’acarreten coles consecuencies de la falta de servicios sociales, que les carga de responsabilidaes estres…  P’Andecha Astur la muyer asturiana carez una duple discriminación: “hai d’amestar la falta d’avances nel díi ente díi de la vida les muyeres y nel casu de les asturianes, amiestar la pertenencia a un pueblu primíu al que nun se-y respeten drechos tan evidentes como poder falar la so propia llingua o decidir llibremente’l so futuru”.

Pel so lláu, Llucía Fernández, , candidata por Andecha Astur-Agora Repúbliques al Congresu español, llamó a francer el discursu del miéu y a costruyir “una Asturies de muyeres fuertes”que ten al frente de la recuperación del país “Quiero ver muyeres asturianes en campu, na ciudá, nes fábriques, nos chigres, pero sobro tou quiero venos nes Cases de Conceyu y na Xunta, faciéndomos sentir, faciéndomos valir”.

Pa finar, nel so comunicáu Andecha Astur llama a dar un pasu más na llucha polos drechos de les muyeres y amestar a los homes nesta griesca,  “porque son la otra metá de la sociedá que tien d’integrar los valores d’avance social y d’igualdá que reivindicamos”.

Redaición InfoAsturies

This work is licensed under a Creative Commons Attribution 4.0 International License.