Anque en munchos centros CCOO defendió la fuelga de solu dos hores, en contraposición a la convocatoria de 24 hores, Úrsula Szalata, responsable d’Empléu de CCOO d’Asturies, destacó la precariedá llaboral femenina “Les muyeres siguimos siendo les más precaries ente les persones precaries”, sofitándose pa ello nos datos fechos públicos apocayá pol Serviciu Públicu d’Emplegu y la Seguridá Social

Los últimos datos, espublizaos en víspores del 8M, dan una idega de la precaria situación de les muyeres asturianes nel mercáu llaboral. Febreru preslló con 76.087 persones iscrites comu paraes nes oficines del Serviciu Públicu d’Emplegu, 21.700 más qu’antes de la crisis. El pasáu mes l’aumentu de población desemplegada foi de 306 persones, con un aumentu del paru del 0’4 % en Asturies frente al 0’1 % estatal.

Dientro d’esos datos, destacó Úrsula, les muyeres:

• Ocupen menos de la metá (el 48%) de los emplegos que coticen a la Seguridá Social; namás son mayoría (y apolmonante: el 96%) nel Sistema Especial d’Emplegaos del Llar.
• Y sicasí son mayoría (el 56%) ente la población parada rexistrada nel Serviciu Públicu d’Emplegu.
• Carecen en mayor midida’l paru de llarga duración: el 46% de les paraes asturianes lleva más d’un añu ensin trabayar, frente al 41% de los desemplegaos varones.
• Tán más desarimaes na situación de desemplegu: namái’l 45% de les paraes con cotización previa cobra prestaciones, frente al 55% de los desemplegaos varones.
• Son destinataries preferentes de la contratación más precaria: el 60% de los contratos temporales a tiempu parcial realizaos en xineru son muyeres.
• Vense claramente apostraes na contratación de más calidá: namái aportaron al 38% de los contratos indefiníos a tiempu completu realizaos a lo llargo del mes de xineru.

Saúl Roza

This work is licensed under a Creative Commons Attribution 4.0 International License.