El diez por cientu de la población asturiana taba ayeri en Xixón. Madrid, con 6’5 vegaes más moraores, protagonizó una manifestación con 300.000 asistentes, ello ye, menos del 5%. El cabréu secular de les asturianes supera al de les madrileñes, non solo polo que’l machismu tien de contrario a la nuesa cultura ancestral, sinón porque les asturianes son de les que más carecen anguaú les consecuencies del patriarcáu. Son más, tan peor pagaes, peor emplegaes y más estudiaes que los asturianos

Ayeri percorrieron les cais de Xixón más de cien mil persones nuna manifestación que superó llargamente la del añu pasáu, calificada ya entós d’hestórica, más de dos kilómetros de pura protesta.

Anantes foren les places de los conceyos, en concentraciones mañaniegues que concentraron en dalgunos casos decenes de miles d’asistentes y la llabor nes cais de les piqueteres, de magar el riscar, pa facer cumplir el drechu a fuelga.

La capacidá aglutinaora de la llucha de la muyer, representando al 60% de la población asturiana, refuerciase cola capacidá d’esti movimientu d’ensiertar nelli munchos otros.

Asina veíemos ayeri una presencia del asturianu (especialmente pente les más moces) namás aventaxada pola vista en movilizaciones específicamente llingüístiques.

Les reivindicaciones llaborales tuvieron abondo espaciu, con denuncia de la precariedá llaboral y la dificultá estrema de la conciliación familiar, cuasi al mesmu nivel que la desixencia d’atención a la dependencia -que, al nun tar atendía na mayoría los casos recae sobre muyeres-, siguía por otres cuestiones comu la defensa del padrimoniu ñatural, la llibertá sesual, los drechos de les pensionistes o la sanidá, con mui especial presencia de les revindicaciones nel ámbetu educativu -el protagonismu estudiantil foi inñegable-.

La problemática de l’Asturies rural nun faltó, con visible presencia de muyeres agricultores y ganaeres y una fuerte representación de les poblaciones del oriente y ocidente asturianu.

Los ocho puntos del 8 M, repartíos en panfletos billingües per tola manifestación, atendíen tamién a estremaos aspeutos: educación, servicios sociales y curiaos, consumu responsable y ecolóxicu, fin de la precariedá llaboral, fin del acosu en cientros educativos, aplicación de les lleis nel ámbetu de los trabayadores domésticos (90% muyeres), titularidá agraria compartida y despatriarcalización de la xusticia.

This work is licensed under a Creative Commons Attribution 4.0 International License.