Informes desapaecios, desaniciu paisaxísticu, cultural ya identitariu, corrupción y clientelarismu, incompetencia política, xestión deficiente de recursos, insuficiente reserva de suelu, despoblación… l’alderique alrodiu l’Ária Metropolitana Cientral d’Asturies valió de marcu pa facer un analís de la situación asturiana dende dellos frentes
Apocalíptico. Asina resumió Roberto González Quevedo, doctor n’Antropoloxía, la situación que se ta viviendo n’Asturies dende’l puntu de vista más humanu “Les polítiques, aplicaes dende enfoques puramente urbanos, son agresives y desmoralizaores pa los habitantes de les zones rurales, la población que queda ta derrotao, vieyo ya en procesu de desaniciu. Non solo les esnales d’Asturies se ven afeutaes pol desaniciu del campesináu, les mesmes zones cientrales lu carecen. Una clas política incompetente ta llevándonos al suicidiu d’Asturies.”
David M.Rivas, Profesor d’Estructura económica na Universidá Autónoma de Madrí, criticó l’aplicación de criterios d’industria clásica pa la ordenación territorial d’Asturies, utilizando conceutos superaos, aplicaos ya nel 64 y que fracasaron n’otres fasteres comu Madrí o Barcelona, ya ignorando otros más actuales, comu’l de “cluster”. Tamién abondó nes llacerioses consecuencies de la despoblación y desaniciu de la fastera rural.
Pel so lláu, Xose Nel Riesgo, Xeógrafu y espertu’n Desendolcu Llocal, quien conoz de primer man la hestoria de la ordenación territorial asturiana, por participar nos años ochenta nel desendolcu d’estudios y proyeutos que, aplicaos en so momentu, tendrien evitao el desastre actual, pero que foron arrequexaos, escaecios ya en dellos casos, desapaecios, acusó direutamente a la clas dirixente asturiana “El gobiernu nun ye inocente, Asturies tien tolos condicionantes pa ser una tierra próspera, pero pa eso tien de desprendese d’esa clas de políticos parásitos que vien careciendo los caberos cien años”. Tamién recalcó la emportancia del seutor agroganaeru na xestión de los montes ya’l drama que’l so abandonu representa pa Asturies, dando datos comu que nos caberos 10 años el surocidente asturianu perdió el 12% de la so población, cifres comparables coles consecuencies de la fame n’Etiopía, o que la matrícula en primaria de los colexos d’Ayer baxó a la metá nos caberos ocho años.
En concreto, Riesgo criticó la falta de reserva estratéxica de suelu a la que llevó el caos na ordenación territorial “en manes de les lleis del mercáu” que pente otros despropositos, urbanizó les meyores vegues d’Asturies, utilizando los meyores terrenos comu almacenes y concesionarios, pero que dexó a la zona cientral, por exemplu, ensin espaciu pa una estación intermodal que coordinare correchamente los tresportes asturianos.
Llucía Fernández, candidata d’Andecha Astur, declaró que la so organización nun se opón por principiu al conceutu d’Aria Metropolitana Cientral, pero consideren que “una decisión de tala importancia a llargu plazu tien que tar basada en daqué más qu’unes hipotétiques subvenciones de finalidá cuando menos dudosa” aludiendo a les redes clientelares del PSOE y a los socesivos casos de marafundiu y corrupción “Tien de ser un proyeutu enartáu nuna visión integral nacional d’Asturies, que contemple una articulación efeutiva de tol territoriu, ensin afondar nos desequilibrios territorales, requisitos toos que nun se tan teniendo en cuenta nel proyeutu nel que se ta avanzando”. Nesi sen, criticó la propuesta actual, que “parte d’una conceición provinciana que pretende aniciar una fastera urbana cientral, privilexada, arrodiada por unes esnales entá más desdexaes de lo que s’alcuentren agora mesmo, acelerándo entá más l’abandonu rural y el despoblamientu nes mesmes” contraponiendo la propuesta d’Andecha Astur, consistente na recuperación de la tradicional cadarma de “poles”, ello ye, reforciar polos de desendolcu económicu ya industrial espardíos estratéxicamente pel territoriu nacional, de forma que se corrixan les desigualdaes estructurales agora mesmo esistentes y se caltenga’l texíu socio-económicu tradicional asturianu.
En resume, los cuatro espertos coincidieron no desafortunao del proyeutu que, dende la perspeutiva antropolóxica, poblacional, paisaxística, territorial, económica y nacional, foi calificada como una continuación y afondamientu del drama que se carez n’Asturies, apuntando al “Principado”, al PSOE y a los intereses económicos y partidistes comu responsables direutos de la situación d’emerxencia actual.
Redaición InfoAsturies
This work is licensed under a Creative Commons Attribution 4.0 International License.
