Asturies ConBici, asociación de ciclismu urbanu y d’alforxes que promueve l’usu de la bicicleta como mediu de tresporte caltenible y saludable, ufierta un añu más los cursos de baldre de la BiciEscuela, el programa de formación ciclista d’Asturies ConBici

Dientro’l proyeutu de biciescuela de l’asociación Asturies ConBici, va tener llugar el prósimu sábadu 16 de marzu n’Avilés un taller de nivel 1 . El taller va llevase a cabu nel aparcamientu de la C/ Valdés Salas (frente al Centru de salú) de 11 a 13:00 y ta destináu a persones adultes que nun saben montar en bicicleta.

Pa los voluntarios de l’asociación Asturies ConBici rescampla l’aumentu imparable del usu de la bicicleta como mediu de desplazamientu nes nueses ciudaes y la necesidá qu’esti usu xenera de formación de los y les ciclistes pa llograr que circulen de forma autónoma, segura y responsable pola calzada.

Toles persones, menores y adultes ensin llende d’edá, que deseyen deprender o ameyorar les sos habilidaes ciclistes van tener nuevamente la oportunidá de participar nos talleres de baldre que l’asociación Asturies ConBici cellebrara otru añu más n’Uviéu, Xixón y Avilés.

Redaición InfoAsturies

This work is licensed under a Creative Commons Attribution 4.0 International License.