A Maxi Areñes, voz de Fontoria, fae-y gracia que nos medios lu llamen “axitador cultural”… por daqué sedrá…  la so música fae’l doble trabayu de facenos mirar pa los nuesos raigaños y, al tiempu, llévanos de viaxe por dellos países. Esta tardi tocará en L’Infiestu dientro de la xira de recoyía de firmes “10.000 firmes pola República”

La primer entruga ye cuasi obligada… cuéntanos los oríxenes de Fontoria

Fontoria entama como un proyeutin va dos años, nel 2017, de la que torné de Cataluña, y lo que diba ser una banda d’acompañamientu pa conciertos mios derivó na vuelta al folk ya’l nacimientu d’una formación con muncha ilusión por sacar coses nueves. Agora mesmo Fontoria compónenla Xose Anxel Allende, cola gaita y percusión, Rita María Alvarez al vigulín, Pablo pumarada al bodram y Maxi, o sea, yo, a guitarres y voz, seique pa conciertos más “grandes” collaboren con nos otros músicos.

Nesti intre’l grupu ta mui ilusionáu y satisfechu cola presentación del nuesu nuevu trabayu, Nordés, que vamos facer en Valles Bocanegra, el 20 d’abril.

Nordés ye un proyeutu mui prestosu nel que teníemos mui claro que queriemos salir un puquiñín de la gaita ya’l tambor, dir un pocu más p’allá de lo que la xente tien en mente cuando se gala de folk pero ensin dexar de ser tradicionales. Ye un folk más progresivu, que deriva en casi unes estructures istrumentales de rock sinfónicu y neoclasicismu.

Tien munches influyencies, bretones pente otres. Non en baldre Nordés, que ye la obra que da entítulu al trabayu, ye una suite bretona en tres partes.

¿Tratais de tresmitir daqué cola vuesa música?

Lo primero, que’l públicu esfrute. La música ye un trabayu y el que va al conciertu, el que merca’l discu, el que mos sienta, tien qu’esfrutar. El nuesu esfrute vien después, cuando ves que presta a la xente.

Queremos tresmitiyos que’l mundiu ye mui grande y puede conocese a traviés de la música. Garres una pieza, por exemplu del Piamonte, das-y una vueltina, xunesla cola tradición asturiana y pónesla nel mapa mental de la persona que la siente. Ye importante sobre tou pa les nueves xeneraciones, la xente nuevo qu’entama y necesita dir conociendo lo qu’hai.

Intentamos plasmar pieces pocu conocies, desendolcando nuevos temes cola raíz del tema inicial, convirtiéndolu n’otru pero calteniendo lo significativo.

¿Comu ves l’intre actual de la música folk en xeneral y de l’asturiana, en particular?

Son tiempos malísimos pa que la xente mozo merque, sobre tou nel panorama folk. Pero hai xente mui bona, n’Asturies. Va pocu tuvimos dando un conciertu nel Casino de Xixón, na Nueche más Llarga, toquemos con Vodoo Grass, con bandes que ya almiraba a títulu personal… foi espectacular.

Hai munchísimo bono pero dase mas bombu y platillu a lo de siempre… estos neños tenien que tar faciendo xires europees. El caberu trabayu d’Anabel Santiago dexome ablucáu, los más puristes rásguense les vestidures, pero son maneres de dar continuidá al folk, música de raigañu pero demostrando que puede dise muncho más allá con ello, una genialidá.

Ruben Bada, LR, tamien tan faciendo coses bárbares, con un panderu y una guitarra elléutrica, en serio, hai coses mui bones.

Los que tamos metíos que conocimos l’esplendor de la música del folk y intentamos seguir faciendo, acábensemos les escuses, ye otra época, ya nun puedes quedar na Danza’l Gochu, hai que sosprender, si quies que se escuche nun puede ser más de lo mesmo… siempres con calidá y ensin salite de madre, claro. Hai que dir más pallá, renovase o morrer… y a piques tuvo de morrer.

Lluéu tan los que s’escuden na etiqueta del folk y lo que tan faciendo ye bachata, que d’eso tamién hai, gandaya aprofitando’l sofitu de dellos coleutivos a la música folk, pensando que val tou. Ya nun val.

¿La música asturiana cuenta con abondusofitu institucional?

Yo tuve’n Cataluña y allí dan importancia muncho más oficial a lo suyo, que yo echo en falta equí, la que se debe tener, les instituciones tienen que dar importancia a la tradición propia. Equí pasen, tan más interesaos en feries d’abril. Lo que nun ye de recibu ye que la fiesta “nacional” española tenga un 6% d’IVA mientres que la música nueso pague’l 21. Eso enciéndeme. Pero colos años deprendí munchisimo y deprendí también que, cuando vien una hostia, hay que saber utilizala como empuxe. Fasta los fios de puta son útiles

Por supuesto hai esceiciones, yo toi mui agradecíu a los medios de comunicación, tantu na tele comu en radio y periódicos, topé con bona xente que m’apoyó y promocionó’l mio trabayu. Si nun ties xente que te mueva, cuesta muncho más salir y facete ver.

Saliéndomos un pocu de la cuestión musical, esti conciertu ta enartáu na campaña “10.000 firmes pola república”. ¿En qué consiste esta campaña?

La campaña ye una propuesta d’Andecha Astur pa presentase a les elleiciones y nella la xente, yo incluyíu -yo ya firmé- puede firmar y demostrar el so sofitu a la República. Esta campaña, que espero que cuanta más xente s’involucre meyor ye itinerante por dellos puntos de la xeografía astur y agora vien a Piloña. Considero que ye importante porque intenten recoyer el querer de munchos ciudadanos que nun tienen opción pa decidir.

Yo soi republicanu, veo osoleta la figura d’una monarquía nun estáu. Dientro d’esa idega puede haber estremaes opciones ya ideoloxía, pero partiendo siempres d’esa base.

Nosotros, Fontoria ponemos con esti conciertu el nuesu granin d’arena, amenizando la tarde, a partir de les siete, amosando’l sofitu a la causa y confiando en que la xente esfrute del llocal, de la música y que apoye la causa.

Ye fantástico que se faiga en Piloña, y na Traviesa, un sitiu conocíu por sofitar eventos y aidar a la música nueso. Confio en que la xente s’anime a dir, porque me costa qu’hai munchu republicanu perequí, polo menos de boquina. Agora tienen una oportunidá bárbara pa demostrar el so apoyu real a la causa republicana.

This work is licensed under a Creative Commons Attribution 4.0 International License.