El númberu d’acidentes en Xineru del 2019 subió un 8’8 por cientu respeutu al mesmu mes del añu pasáu, con un total de tres muertes y 1.010 accidentes de trabayu con baxa
Los datos espublizaos pola Sociedá Asturiana d’Estudios Económicos ya Industriales (Sadei) indiquen un incrementu del númberu d’acidentes llaborales nesti entamu d’añu.
Esti datu aporta depués d’un descomanáu amenorgamientu nel númberu d’acidentes de magar l’añu 2.000, fecha na que’l Sadei entamó a recoyer esta información, cuando se rexistraben 24.000 acidentes llaborales al añu, con 40 d’ellos mortales; esti datu contrasta col de 2017, cuando la siniestralidá llaboral algamó la segunda cota más baxa, -depués de 2013-, con 11.711, menos de la metá que a entamos del mileniu.
El 2018 ya nun foi tan positivu, con 16 acidentes más, un total de 11.727, nos que s’incluin 26 fallecimientos, dengún d’ellos nel primer mes del añu. El 2019 entama con males cifres: tres acidentes mortales solo en xineru, toos ellos in itínere (camín al trabayu o de vuela d’elli) ya un incrementu de cuasi’l nueve por cientu nel cómputu total.
El perfil más afeutáu polos acidentes sigui siendo masculín, de mediana edá y recién incorporáu al puestu de trabayu, siendo les primeres hores de la mañana les que mayores incidencies rexistren.
Nuria Prendes
This work is licensed under a Creative Commons Attribution 4.0 International License.
