Cangas acueye esti fin de selmana un congresu dedicáu a xugar comu se facía anantes… y se sigui faciendo

Coincidiendo col XX aniversariu de la recuperación del bolu vaqueiru, Cangas aconceyará espertos y xugaores de xuegos tradicionales asturianos, españoles, portugueses y catalanes, en tres díes de charres, esibiciones y práutica nos que l’arruelu sedrá’l protagonista.

Les xornaes entamen el vienres 29 a les cincu la tardi, cola apertura istitucional a cargu de l’Asociación Cultural Lo Nueso, Francisco Álvarez, de l’Asociación Bolu Vaqueiru, Pere Lavega, de AEXDT y José Victor Rodriguez en  representación del conceyu Cangas.

Esi mesmu díe podrá participase nos talleres d’enseñu de xuegos, visitase la esposición “20 años pa nun esqueicer” o sentir la primera de les charres que se fadrán nestos tres díes. Les sesiones d’enseñu y xuegu repetiránse tolos díes y tan programaes delles visites, un campionatu, un homenaxe y la puesta de la primer piedra na bolera municipal, polo que convidamos a lleer con calma l’apretáu programa d’estes xornaes.

Llucía F. Marqués

This work is licensed under a Creative Commons Attribution 4.0 International License.