Los altos niveles de contaminación qu’esta triba d’industria xenera y la so necesidá costante de maera de rápidu xorrecimientu llevaron a los gallegos a demandar a la empresa papelera Ence, torgando la so ampliación y desviándola a Asturies, onde’l “Principado” los acueye colos brazos abiertos
Pesi a la concesión anicial del PP, que permitiría a la fabrica gallega d’Ence caltenese’n Pontevedra otros 60 años, l’aición conxunta de Greenpeace, el Conceyu de Pontevedra y l’Asociación pola defensa da Ría tien toles de ganar na so demanda ante la Audiencia Nacional pa que s’anule la concesión a la pastera, fecha por Rajoy en Xineru de 2016, pola so altísima contaminación ambiental.
D’ehí la decisisión de la papelera de facer una “gran inversión” na fabrica asturiana, allugadan Navia, que ya batió l’añu pasáu’l so record de produción hestórica y que cuenta con siguir medrando fasta agamar una produción de 685.000 tonelaes añales, amás d’entamar a fabricar celulosa d’usu testil y pa productos d’ixene.
La empresa nun descarta presllar la planta de Pontevedra a mediu plazu y nun escuende’l so envís d’ufrir trabayos de bien baxu nivel. Nes sos declaraciones la direutiva aseguró que tomarán una decisión basándose esclusivamente en “criterios económicos”. “La maera en Galicia nun ye barata y la man d’obra tampoco”.
Llucía F. Marqués
This work is licensed under a Creative Commons Attribution 4.0 International License.
