Esti mes van facese 4 percorrios por Cimavilla y los beneficios dirán a la Fundación pola Aición Social Mar de Niebla

Dientro la riestra de visites solidaries entamaes por Xixón Turismu nel plan d’aiciones p’algamar el sellu Biosphere Empreses pa Infoxixón, los díes 14, 19, 20 y 27 d’esti mes percorreráse’l barriu más antiguu de Xixón, Cimavilla, visitando les sos places y cais pa conocer los sos edificios y requexos más emblemáticos.

Les visites saldrán a les doce’l mediudíi de la oficina turismu (Infoxixón) de Fomento y pasarán pela plaza’l Marqués, la plaza Mayor, Campu Valdés, plazuela Xovellanos (inclúi un percorríu guiáu pel Muséu Casa Natal de Xovellanos), la Torre’l Reló y restos de la muralla romana, plaza d’Arturo Arias, plaza la Soledá, capiella la Soledá, Cuesta’l Cholo y la escultura del Nordés. Dende ehí, xubirán a L’Atalaya pa terminar cabu l’Eloxu l’Horizonte, la controvertía obra d’Eduardo Chillida.

La visita tien un coste de 5€  que se donarán ca mes a una aición de responsabilidá social, nesti casu a Mar de Niebla. Ye preciso iscripción previo.

Redaición InfoAsturies

This work is licensed under a Creative Commons Attribution 4.0 International License.