“Nun tenemos d’escaecer que Mieres tien enforma qu’ufiertar tocantes a paisaxe y naturaleza y que ta infravalorao. Podría sacase enforma provechu si se creare un plan d’actuación para caltener rutes, caminos,… en condiciones óptimes, ensin escaecenos de la so afayadiza promoción”, declara la candidata de la formación, Patricia García Moro

Énte’l zarru de la minería, la perda de población del conceyu y la falta d’opciones llaborales, la formación propón l’adecuación y recatalogación de rutes senderistas y el caltenimientu del aníu ciclista pa “atraer el turismu de naturaleza”, un tipu de turismu que, según palabres de la candidata, “ta n’alza y ye poco esixente”.

Tamién s’amosó satisfecha énte la noticia de que’l Conceyu de Mieres sacó a llicitación les obres d’ampliación de la sienda piatonal de Rioturbio dica l’área d’arruelu d’El Carbayón. “Por fin vamos ver rematada esta sienda, pidimientu que yá realizamos va un añu dientro de les nueses reivindicaciones rellacionaes col estáu de les nueses siendes y rutes, que dexen tantu que deseyar”, manifestó.

Redaición InfoAsturies

This work is licensed under a Creative Commons Attribution 4.0 International License.