A pocos díes de les elleiciones Andecha Astur recibió un documentu nel que se informa de que se yos devuelve un escritu presentáu n’asturianu “faciéndo-yos saber que tendrá de presentalu, nel so casu, n’idioma oficial”, lo que ye un desacatu direutu a la decisión del Tribunal Costitucional

El refugáu ye un documentu nel que la formación política píde a la Xunta Elleutoral que notifique a les meses elleutorales la correcha interpretación de la llexisllación española pa que nun se produzan situaciones illegales comu les asocedíes nes caberes elleiciones españoles: retirá de papeletes d’Andecha Astur de les meses elleutorales, anulación de votos emitíos a favor d’Andecha Astur con papeletes impreses n’asturianu… poro, y considerando que demientres los caberos 20 años y nesti mesmu procesu elleutoral la X.E. aceutó otros escritos n’asturianu, n’Andecha Astur albidren que’l sosprendente determín ye de triba política.

Temen tamién que la refuga d’esti documentu implique la tácita aceutación por parte de la Xunta Elleutoral del fraude que nel mesmu se trata de prevenir.

Andecha Astur algamó nel añu 2000 que’l Tribunal Costitucional español reconociere a tol Pueblu Asturianu’l so drechu a usar la llingua nacional nos procesos elleutorales (STC 48/2000), drechu qu’exerció de magar entos en toles comunicaciones cola Xunta Elleutoral d’Asturies, siendo l’únicu partíu que decidió exercer esti drechu democráticu.

Esta ye la primer ocasión en que la Xunta Elleutoral decide desobedecer al Tribunal Costitucional español, precisamente cuandu Andecha Astur -y pidi qu’informe a les meses de la llexisllación que protexe’l votu n’asturianu.

Pa  Paulu Arboleya, Secretariu Xeneral d’Andecha Astur, esto traduzse’n que “l’Estáu español nun quier garantizar el drechu del Pueblu Asturianu a emplegar la so llingua nesti procesu elleutoral, drechu protexíu pol so propiu Tribunal Costitucional. L’Estáu español nun asegura al Pueblu Asturianu un recuentu xustu, oxetivu y veraz”.

Tres esti gravísimu determín de la xusticia española, Andecha Astur vien de recurrir énte la Xunta Elleutoral Central y emplegará tolos recursos posibles na defensa llegal de los drechos llingüísticos y políticos del Pueblu Asturianu.

Asinamesmo, Andecha Astur acaba pidir amparu a l’Academia de la Llingua Asturiana, que ye la istitución del país encargá estatutariamente de curiar los drechos llingüísticos asturianos. Andecha Astur sedrá recibía nes prósimes 24 hores pa presenta-y esti casu de represión llingüística y antidemocrática y pa pidi-y a l’ALLA qu’entame les iniciatives necesaries pa garantizar el drechu los asturianos a utilizar la llingua nacional nos procesos elleutorales, comu asegura la sentencia’l Costitucional que ganó Andecha Astur nel añu 2000.

Redaición InfoAsturies

This work is licensed under a Creative Commons Attribution 4.0 International License.