Énte l’auxe del facismu n’Asturies, nel Estáu español y n’Europa, Xixón cellebra’l Díi de la Victoria, nel que se remembra la derrota de l’Alemaña Nazi, que tal díi comu güei roblaba la so rindición incondicional, dando por finada la II Guerra Mundial nel continente européu.

La convocatoria, secundada por delles organizaciones de calter antifacista y d’izquierdes, surde a nivel personal de delles persones que ven la necesidá de facer alcordanza y homenaxe a los miles d’antifacistes que dieron la so vida pa finar col nacifacismu n’Europa, a los más de 50 miyones de muertos y cientos de miles de deportaos y refuxaos de la II Guerra Mundial.

Pa los convocantes, esta guerra nun sedría posible ensin el sofitu del gran capital industrial y financieru mundial al nazismu y consideren la Guerra española un preludiu necesariu de la mundial. De la mesma mena, declaren, les consecuencies de la victoria nun aportaron enxamás a España, onde los heroes foron condergaos a l’escaezu ya’l facismu venció y caltúvose’n poder, ensin qu’a díi de güei nun se diere entá la necesaria rotura col réxime franquista “Nel Estáu Español el facismu sigue siendo llegal, el franquismu y los sos herederos siguen ensin ser condergaos pol Parlamentu onde los facistes ocupen escaños a los sos deleres, l’esterminiu franquista sigue ensin ser investigáu xudicialmente y munchos de los criminales franquistes entá vivos siguen ensin ser procesaos polos sos crímenes al par qu’esfruten d’una xubilación pagada por tolos ciudadanos. Y de xacíu, les víctimes del franquismu siguen ensin ser reconocíes nin políticamente nin xurídicamente pol Estáu”.

Xixón ye’l sitiu escoyíu pa esta cellebración, por ser ún de los llugares onde tienen más presencia n’Asturies los neonazis, teniendo munchu espaciu nel mundu del fúbol y xinasios de la ciudá.