Pesi a les presiones ciudadanes a la escontra, concedióse a la empresa pública HUNOSA y Volta el permisu d’investigación d’Hidrocarburos que l’autoriza a buscar “gas natural non convencional d’abegosa estración”, estraíble al traviés de frayaura hidráulica o fracking

Llucía Fernández Marqués

Esti permisu, al que se llamó “Llábana-1”, autoriza la esploración nuna superficie averada de 37.314 hectárees, que afeuten a los conceyos d’Uviéu, Sieru, Sariegu, Bimenes, Llaviana, Samartín del Rei Aureliu, Llangreu, Mieres, Ayeri, L.lena y Ribera d’Arriba.

Con esta autorización incumple l’alcuerdu de la Xunta Xeneral adoptáu’l 8 de febreru de 2013 sobre una “normativa responsable y coherente col principiu de precuru nes decisiones relatives a la estración de recursos y d’oposición a la estracción de gas por fracking“ espublizada nel Bopa 12 de febreru de 2013.

Amás, anguaño tán en marcha 143 allegamientos en contra d’esti proyectu, incluyendo les interpuestes polos Conceyos con más población de los afeutaos pol proyeutu;  Uviéu, Sieru, Mieres, Llangréu, L.lena y Bimenes.

En casu de topase gas nes zones estudiaes, esti atoparíase partíu en pequenes burbuyes infiltraes na roca. Pa la so estracción ye necesariu axuntar el gas rompiendo les capes de roca y que ésti fluya escontra la superficie, pa lo que se provoquen quebres nel sosuelu, inyectando miles de tonelaes d’agua a bien alta presión, entemecío con sable y aditivos químicos.

L’impactu ambiental –especialmente en contaminación de l’agua- ye tan evidente como’l riesgu qu’implica pa la estabilidá del sosuelu, lo que llevó a dellos países a prohibir el fracking o, siquier, a instaurar una moratoria. Ye’l casu d’Alemaña, Francia, Escocia, Bulgaria, Suráfrica y en dellos estaos d’EEXX. Equí en Asturies son numberoses les iniciatives y declaraciones de Conceyos contra’l fracking, que son sistemáticamente ignoraes pol Principáu” .

This work is licensed under a Creative Commons Attribution 4.0 International License.